शहापुरात शिवजयंती मिरवणूक शिस्तबद्ध अन् उत्साहात निघणार

बेळगाव : शिवजयंतीनिमित्त होणारी चित्ररथ मिरवणूक यावर्षी शनिवार दि. 27 मे रोजी मोठ्या उत्साहात होणार आहे. बेळगाव शहरासह शहापूर विभागातही नियोजनबद्ध पद्धतीने यावर्षीची मिरवणूक होईल. बॅ. नाथ पै चौक येथे चित्ररथांचे स्वागत केले जाईल, अशी माहिती शहापूर शिवजयंती उत्सव महामंडळाचे अध्यक्ष नेताजी जाधव यांनी दिली. रविवारी नाथ पै चौक येथे साईगणेश सोसायटीच्या सभागृहात मंडळाची बैठक पार पडली. यावेळी शहापूर परिसरातील शिवजयंती उत्सव मंडळाचे पदाधिकारी व कार्यकर्ते उपस्थित होते. शिवजयंतीवेळी विधानसभा निवडणुकीची आचारसंहिता असल्यामुळे चित्ररथ मिरवणूक काढण्यात आली नव्हती. पोलीस प्रशासनाच्या सूचनेनुसार शनिवार दि. 27 मे रोजी शहरात भव्य शिवजयंती चित्ररथ मिरवणूक काढली जाणार आहे. शहापूरमध्येही अनेक शिवजयंती उत्सव मंडळे असून नाथ पै सर्कलमार्गे ते शहराच्या दिशेने जातात. सायंकाळी 6 वाजता पहिल्या गाड्याचे पूजन होणार असून त्यानंतर टप्प्याटप्प्याने इतर गाडे पुढे सरकणार असल्याचे सांगण्यात आले. शहापूर विभागातील शिवजयंती मंडळांना काही अडचणी असल्यास त्यांनी महामंडळाच्या पदाधिकाऱ्यांशी संपर्क साधावा, असे आवाहन करण्यात आले. मिरवणूक शांततेत व सलोख्याने व्हावी, यासाठी सर्व शिवप्रेमींनी प्रशासनाला सहकार्य करावे, असे यावेळी सांगण्यात आले. या बैठकीला हिरालाल चव्हाण, श्रीकांत प्रभू, नगरसेवक नितीन जाधव, सेक्रेटरी श्रीकांत कदम, सुधीर कालकुंद्रीकर, रविंद्र शिगीहळ्ळीकर, अभिजीत मजुकर, सूरज कडोलकर, शिवकुमार मनवाडकर, सूरज लाड, चौगुले, पी. जे. घाडी यासह इतर उपस्थित होते.