हातावर गोंदवून युवकाने दाखविली समितीनिष्ठा!

बेळगाव : येळ्ळूर येथील पाटील गल्लीतील तरुणाने हातावर चक्क एमईएस असे गोंदवून आपण म. ए. समितीचा निष्ठावंत कार्यकर्ता असल्याचे दाखवून दिले आहे. या गल्लीविषयीही वेगवेगळ्या चर्चा केल्या जात होत्या. मात्र, सर्वांनीच एकजुटीने रमाकांत कोंडुस्कर यांना पाठिंबा दर्शविला आहे. आता तरुणाने गोंदून घेऊन आपली साक्ष दिली आहे. त्यामुळे हा सर्वत्र चर्चेचा विषय बनला आहे. येळ्ळूर गाव समितीशी एकनिष्ठ असलेले गाव म्हणून ओळखले जाते. या गावातूनच दक्षिण मतदार संघाचे उमेदवार रमाकांत कोंडुस्कर यांनी आपले रणशिंग फुंकले आहे. या फेरीमध्ये हजारो तरुणांनी सहभाग दर्शविला. भव्य प्रचारफेरी काढून साऱ्यांचेच धाबे दणाणून सोडले आहेत. येळ्ळूरमधील या फेरीनंतर संपूर्ण दक्षिण मतदार संघातील म. ए. समितीच्या कार्यकर्त्यांनी एकजुट दाखवून त्यांना पाठिंबा दर्शविल्याने संपूर्ण चित्रच पालटले आहे. म. ए. समितीच्या उमेदवाराला सर्वत्र भरघोस पाठिंबा मिळू लागला आहे. आता हातावर गोंदवून समिती विषयीचे प्रेम युवक व्यक्त करू लागले आहेत. येळ्ळूर येथील तरुणाने हे प्रेम दाखविल्यानंतर अनेक तरुण पुढे येत आहेत.