पारनट्टीमध्ये बस प्रवाशाकडून 65 लाख रुपये जप्त

बेळगाव : परिवहन मंडळाच्या बसमधून प्रवास करणाऱ्या एका प्रवाशाच्या बॅगमधून 65 लाख रुपये जप्त करण्यात आले आहेत. सोमवारी सायंकाळी गोकाक तालुक्यातील पारनट्टी चेकपोस्टवर पोलीस व निवडणूक विभागाच्या अधिकाऱ्यांनी ही कारवाई केली आहे. जिल्हा पोलीसप्रमुख डॉ. संजीव पाटील यांनी ही माहिती दिली असून गोकाकचे प्रांताधिकारी व प्राप्तिकर विभागाच्या अधिकाऱ्यांना या कारवाईची माहिती देण्यात आली आहे. बसमध्ये मोठ्या प्रमाणात रक्कम नेणाऱ्या प्रवाशाची चौकशी करण्यात येत असून रात्री उशिरापर्यंत यासंबंधीची कारवाई सुरू होती. बेळगावहून अवरादकडे निघालेली परिवहन मंडळाची बस अडवून पारनट्टी चेकपोस्टवर अधिकाऱ्यांनी तपासणी केली असता एका प्रवाशाच्या बॅगमध्ये 65 लाख रुपये आढळून आले. ही रक्कम कोणाची आहे? कोणत्या कारणासाठी बसमधून मोठ्या रकमेची वाहतूक करण्यात येत होती? यासंबंधीची चौकशी करण्यात येत आहे.