गोमंतक मराठा समाज संस्था अध्यक्षपदी सुरेश काणकोणकर

पणजी : गोमंतक मराठा समाज गोवा संस्थेच्या येथील राजाराम स्मृती सभागृहात रविवारी झालेल्या कार्यकारी मंडळावर अध्यक्षपदी अॅड सुरेश काणकोणकर यांची बिनविरोध निवड झाली आहे. गोमंतक मराठा समाजाच्या पणजीतील मुख्य कार्यालयात आमसभेचे आयोजन करण्यात आले होते. त्यात नवीन कार्यकारी मंडळ निवड करण्यासाठी ज्येष्ठ समाज कार्यकर्ते मोहनदास लोलयेकर यांची निवडणूक प्रमुख म्हणून नियुक्ती करण्यात आली होती. अध्यक्षपदी अॅड काणकोणकर, संयुक्त सचिव मृणाल म. लोलयेकर व खजिनदार जितेंद्र नाना शिरगावकर यांचा एकमेव उमेदवारी अर्ज आल्यामुळे याआधीच निवड झाली होती. तद्नंतर पुढील पदांसाठी मतदानाद्वारे उपाध्यक्षपदी दीपाली दीपक बाणस्तारकर, सचिवपदी उत्कर्षा उमेश बाणस्तारकर, कार्यकारी सदस्य म्हणून महेश मोतीराम केरकर, संदेश गुरुदास नाईक, राजेश मधुकर मांद्रेकर, सुफल संजय मांद्रेकर, आनंद नरहरी पेडणेकर, सुहास गजानन नाईक, अभय लाडको देविदास व सुनिता पेडणेकर यांची बहुमतांनी निवड झाली. आमसभेत हीशोबाच्या प्रश्नावर चर्चा झाली. निवडणूक व आमसभा खेळीमेळीच्या वातावरणात पार पडली. समाजबांधवांनी आपल्यावर विश्वास ठेवून बिनविरोध निवडून आणले आहे. समाजबांधवांनी कोणताही मतभेद न ठेवता आपल्याला सहकार्य करावे व समाजहित राखावे. समाजबांधवांना एकत्रित आणण्यासाठी आणि विविध कार्यक्रम राबविण्यासाठी आपला प्रयत्न नेहमीच राहिल, असे आश्वासन नूतन अध्यक्ष सुरेश काणकोणकर यांनी पत्रकारांशी बोलताना दिले. निवडून आलेल्या नूतन कार्यकारी मंडळातील पदाधिकाऱ्यांचे काणकोणकर यांनी अभिनंदन करून पुढील कार्यासाठी सुभेच्छा दिल्या आहेत.