पुणे / वार्ताहर :
मुंबईला जाणाऱ्या एका धावत्या एक्सप्रेसमधून पत्नीसह दोन वर्षाच्या चिमुरडीस सराईत गुन्हेगाराने अचानक बाहेर ढकलल्याने मुलीचा दुर्दैवी मृत्यू झाला, तर मुलीच्या आईवर ससून रुग्णालयात उपचार सुरु आहेत, अशी माहिती पोलिसांनी दिली आहे.
आर्या आकाश भोसले (वय -2, रा. पद्मावती,पुणे) असे अपघातात मृत्युमुखी पडलेल्या मुलीचे नाव आहे. तिची आई वृषाली (वय- 22) यात गंभीर जखमी झाली असून, तिच्यावर ससून रुग्णालयात अतिदक्षता विभागात उपचार सुरु आहेत. याप्रकरणी आरोपी आकाश भोसले याच्या विरुद्ध लोहमार्ग पोलिसांनी गुन्हा दाखल केला आहे.
आकाश सराईत गुन्हेगार असून, त्याच्या विरुद्ध विविध पोलीस ठाण्यात गंभीर स्वरुपाचे सात गुन्हे दाखल आहेत. कौटुंबिक वादातून त्याने पहिल्या पत्नीचा खून केला होता. सध्या तो येरवडा कारागृहातून जामीन मिळवून बाहेर आला आहे. 19 मार्च रोजी आरोपी आकाश पत्नी वृषाली आणि मुलगी आर्याला घेऊन मुंबईला रेल्वेने निघाला होता. हाजी अली दर्ग्यात दर्शनासाठी जायचे आहे, असे त्याने पत्नीला खोटे सांगितले होते. पुणे रेल्वे स्थानकातून प्रगती एक्सप्रेसमधून ते निघाले होते. त्यानंतर काही वेळातच खडकी रेल्वे स्थानक परिसरात त्याने पत्नीला दरवाज्यात बोलावले.यावेळी वृषालीच्या कडेवर आर्या होती. त्यांना दोघींना अचानक धावत्या रेल्वेतून आकाशने ढकलून दिले. रेल्वेतील प्रवाशांच्या हा प्रकार लक्षात आल्यानंतर त्यांनी गाडीतील साखळी ओढून गाडी थांबविली. दरम्यान, या घटनेची माहिती मिळताच, लोहमार्ग पोलिसांचे पथक घटनास्थळी दाखल झाले. दोघींना तातडीने ससून रुग्णालयात रूग्णवहिकेतून दाखल करण्यात आले. मात्र, उपचारादरम्यान आर्याचा दुर्देवी मृत्यू झाला, असे लोहमार्ग पोलीस ठाण्याचे वरिष्ठ पोलीस निरीक्षक प्रमोद खोपीकर यांनी सांगितले. लोहमार्ग पोलिसांनी आकाशला अटक केली असून, सहायक पोलीस निरीक्षक सुप्रिया जगताप याबाबत पुढील तपास करत आहेत.
अधिक वाचा; महिला स्वच्छतागृहांचा तुटवडा ही चिंतेची बाब : रुपाली चाकणकर
