आमदार लक्ष्मी हेब्बाळकर यांचे स्वप्न लवकरच साकार होणार
बेळगाव : बेळगाव ग्रामीण मतदारसंघात आमदार लक्ष्मी हेब्बाळकर यांचे स्वप्न लवकरच पूर्णत्वास येणार आहे. राजहंसगड येथे उभारण्यात आलेल्या छत्रपती शिवाजी महाराजांच्या मूर्तीचे अनावरण 5 मार्च रोजी होणार आहे. यावेळी कर्नाटक व महाराष्ट्रातील विविध मान्यवरांची उपस्थिती राहणार आहे. यानिमित्त 4 व 5 मार्च रोजी विविध कार्यक्रमांचे आयोजन करण्यात आले आहे. दि 5 मार्च रोजी सकाळी 10 वाजता 50 फूट उंच छत्रपती शिवाजी महाराजांच्या मूर्तीचा अनावरण सोहळा होणार आहे. यावेळी राष्ट्रीय काँग्रेस पक्षाचे अध्यक्ष मल्लिकार्जुन खर्गे, कर्नाटक विधानसभेतील विरोधी पक्षनेते माजी मुख्यमंत्री सिद्धरामय्या, कर्नाटक प्रदेश काँग्रेस समिती अध्यक्ष डी. के. शिवकुमार, शिवाजी महाराजांचे 13 वे वंशज युवराज संभाजीराजे छत्रपती, विधान परिषद सदस्य सतेज उर्फ बंटी पाटील, लोकसभा सदस्य व सिने अभिनेता डॉ. अमोल कोल्हे, लातूर ग्रामीणचे आमदार धीरज देशमुख, प्रसिद्ध अभिनेते रितेश देशमुख यांच्यासह मान्यवर उपस्थित राहणार आहेत.
60 फूट उंचीचा इलेक्ट्रीक ध्वजस्तंभो याप्रसंगी उद्घाटन केले जाणार आहे. राजहंसगड किल्ला सजविण्यात आला असून नवे महाद्वार, किल्लाद्वार निर्माण केले आहे. किल्ला आवारात असलेल्या सिद्धेश्वर मंदिराचा आकर्षक जीर्णोद्धार केला आहे. 4 मार्च रोजी विविध धार्मिक व पारंपरिक कार्यक्रमांना सुरुवात होणार असून, 2 दिवस मूर्ती प्रतिष्ठापना महोत्सवाच्या निमित्ताने विविध कार्यक्रम होणार आहेत. बेळगावच्या इतिहासात विशेष लेझर शो, क्रॅकर शोदेखील होणार आहेत. पालखी उत्सव, पोवाडा, ढोल-ताशा नृत्य, मर्दानी खेळ आदी पारंपरिक कार्यक्रमांचे आयोजन केले आहे. ऐतिहासिक राजहंसगड किल्ला सुंदर पर्यटनस्थळ म्हणून विकसित व्हावे, तेथे भव्य शिवाजी महाराजांची मूर्ती उभारावी, असे बेळगाव ग्रामीण मतदारसंघाच्या आमदार लक्ष्मी हेब्बाळकर यांचे अनेक वर्षांपासूनचे स्वप्न होते. ते आता पूर्ण होणार आहे.
