कराडला उड्डाणपूल कामाचा आमदार पृथ्वीराज चव्हाणांनी घेतला आढावा
प्रतिनिधी / कराड
पुणे- बंगलोर महामार्गावरील कोल्हापूर नाका येथील कराड व मलकापूर शहराजवळील उड्डाणपूल पाडण्याच्या कामाचा माजी मुख्यमंत्री पृथ्वीराज चव्हाण यांनी मंगळवारी आढावा घेतला. कराडच्या शासकीय विश्रामगृहात सर्वच विभागांच्या अधिकारी, कर्मचारी यांच्याशी त्यांनी संवाद साधत नागरिक, वाहनधारकांची गैरसोय जास्त होऊ नये असे काम करा अशा सुचना दिल्या. यानंतर कोल्हापूर नाका व ढेबेवाडी फाटा येथील दोन्ही पूलाची पाहणी करून संबधित कंपनीच्या अधिकायांशी चर्चाही केली.
कराडचा उड्डाणपूल हा आज मध्यरात्रीपासून बंद होणार असून उद्या दिवसाच पूल पाडण्याच्या कामाला सुरूवात होणार असल्याची माहिती डीपी जैन यांनी आ.चव्हाण यांना आढावा बैठकीत सांगितली. कंपनीचे सतेंद्रा कुमार वर्मा यांनी पुलाच्या कामाबाबत सादरीकरण केले. यावेळी रयत सह. साखर कारखान्याचे चेअरमन तथा महाराष्ट्र प्रदेश काँग्रेस कमिटीचे सरचिटणीस ?डव्होकेट उदयसिंह पाटील-उंडाळकर, पोलिस उपअधीक्षक डॉ. रणजीत पाटील, प्रातांधिकारी उत्तम दिघे, कराड शहर पोलिस ठाण्याचे वरिष्ठ पोलिस निरीक्षक बी. आर. पाटील, वाहतूक शाखेच्या सरोजीनी पाटील, कराड शहर कॉंग्रेसचे शहराध्यक्ष ऋतुराज मोरे, कराड उत्तर काँग्रेसचे अध्यक्ष निवासराव थोरात, झाकीर पठाण, मलकापूरच्या नगराध्यक्षा निलम येडगे, उपनगराध्यक्ष मनोहर शिंदे, ठाकरे गटाचे नितीन काशिद, मनसेचे दादासो शिंगण, धनंजय येडगे, शंकरराव खबाले, नामदेवराव पाटील, अशोकराव पाटील यांच्यासह कराड व मलकापूर शहरातील पदाधिकारी तसेच बांधकाम विभागाचे अधिकारी उपस्थित होते. कराड शहराचे प्रवेशद्वार असलेल्या कोल्हापूर नाका येथील 2003 साली बांधलेला उड्डाणपूल जमीनदोस्त होणार आहे. त्याठिकाणी 550 कोटी रूपये खर्चून 3.70 किलोमीटर अंतराचा सहापदरीकरणचा उड्डाणपूल होणार आहे. तसेच या उड्डाणपुलाखाली आठ पदरी रस्ता होणार आहे. या पूलाचे काम अदानी समूहाला दिले असून डीपी जैन ही कंपनी काम करणार आहे. शनिवारी मध्यरात्री म्हणजेच रविवारी पाच रोजी रात्री बारा नंतर सदरील उड्डाणपूलावरील वाहतूक बंद करण्याबाबत जिल्हा पोलिस प्रमुख समीर शेख यांनी अधिसूचना जारी केली होती. त्यामुळे गेल्या दोन दिवसापासून वाहतूक सुरू असल्याने नक्की पूल कधी पाडणार याबाबत चर्चांना उधाण आले होते. परंतु, आता या प्रोजक्टचे प्रमुख इंजिनिअर सतेंद्रा कुमार वर्मा यांनी या बैठकीनंतर ही अधिकृत माहिती दिलेली आहे
