ऑनलाईन टीम / तरुण भारत :
पुण्यातील मनसेचे जिल्हाध्यक्ष समीर थिगळे यांच्यावर कुटुंबासमोरच गोळीबार करण्यात आल्याची धक्कादायक घटना घडली. थिगळे यांच्या राजगुरुनगमधील सातकरस्थळ येथील राहत्या घरासमोर हा प्रकार घडला. त्यामुळे परिसरात दहशतीचे वातावरण निर्माण झाले आहे. याप्रकरणी मिलिंद जगदाळे आणि मयूर जगदाळे दोन आरोपींवर गुन्हा दाखल करण्यात आला आहे. हे दोन्हीही सराईत गुंड असून, मोक्कातील आरोपी आहेत.
मिळालेल्या माहितीनुसार, समीर थिगळे हे आपल्या राजगुरुनगरच्या सातकरस्थळ येथील घरासमोर असताना “मी खेडचा भाई आहे, एकाला घालवलाय तुलाही माज आला आहे. तुला संपवतोच”, असं म्हणत आरोपीने पिस्तुल रोखून थिगळे यांच्याकडे खंडणी मागितली. त्यानंतर कुटुंबासमोरच थिगळे यांच्यावर गोळी झाडली. पण सुदैवाने पिस्तुलातून गोळी सुटली नाही. त्यामुळे मोठा अनर्थ टळला. त्यानंतर आरोपींनी हवेत गोळीबार करून थिगळे यांना धमकावून घटनास्थळावरून पळ काढला. थिगळे यांच्या कुटुंबीयांसमोरच हा धक्कादायक प्रकार घडल्याने थिगळे कुटुंबीय हादरून गेले आहेत.
अधिक वाचा : आघाडीतील नेत्यांसोबतच्या चर्चेनंतर पोटनिवडणुकीचा निर्णय, अजित पवार यांचे स्पष्टीकरण
आरोपींविरोधात खंडणीआणि प्राणघातक हल्ला केल्याप्रकरणी गुन्हा दाखल करण्यात आला असून, राजगुरूनगर पोलीस त्यांचा शोध घेत आहेत.
