कोल्हापूर : दूधगंगा नदीतून इचलकरंजीला पाणीपुरवठा करणारी योजना रद्द करावी या मागणीसाठी दूधगंगा बचाव कृती समितीने जिल्हाधिकारी कार्यालयावर विराट मोर्चा काढला आहे. कागल, शिरोळ, हातकणंगले, राधानगरी निपाणी आणि चिकोडी तालुक्यातील शेकडो शेतकरी घोषणाबाजी करत या मोर्चात सहभागी झाले होते.
ऐतिहासिक दसरा चौकातून या मोर्चाला सुरुवात झाली असून जिल्हाधिकारी कार्यालयावरती हा मोर्चा धडकला आहे. मोर्चात सहभागी झालेल्या शेतकऱ्यांनी हातात घेतलेले फलक लक्षवेधी होते. दूधगंगा नदीतून इचलकरंजीला पाणीपुरवठा करणाऱ्या या योजनेला यापूर्वी विरोध म्हणून अनेक आंदोलन झाली तरीही राज्य सरकारने याकडे दुर्लक्ष केल्यामुळे आता आरपारची लढाई लढू असा इशारा आंदोलकांनी दिला आहे.
