मान्यवरांच्या हस्ते शुभारंभ करून पठार पर्यटकांस खुले, पहिल्याच दिवशी गर्दी वाढली
वार्ताहर / कास
रंगीबेरंगी नैसर्गिक फुलांची पंढरी म्हणुन जगभर ख्याती पसरलेल्या कास पुष्पपठार वरील या वर्षीच्या हंगामाचा शुभारंभ कोल्हापुर वनवृतचे मुख्य वनसंरक्षक आर. एम. रामानुजम यांच्या हस्ते फित कापुन करण्यात आला. कास पठारावर निसर्गाचा अनमोल ठेवा असुन त्याच्या जतनाशी कोणतीही तडजोड होता कामा नये. फुलांची घटती संख्या लक्षात घेऊन त्यामध्ये कशी वाढ होईल यासाठी उपाययोजना व्हाव्या अशा सक्त सूचना देत वनसमितीचे कार्य कौतुकास्पद असुन वनविभागाच पूर्ण सहकार्य लाभेल, असे गौरवोद्गार त्यांनी काढले. पहिल्याच दिवशी हजारो पर्यटकांनी अधुनमधुन पडणाऱया रिपरिप पाऊस धुक्याच्या धुलईत रानफुलांसह निसर्गाचा मुनमुराद आनंद लुटला.
यावेळी कोल्हापुर वनवृतचे मुख्यवनसंरक्षक आर. एम. रामानुजम, सातारा उपवनसंरक्षक उत्तम सावंत, सहाय्यक वनसंरक्षक सुधीर सोनवले, माजी जि प सदस्य राजु भोसले, जावली वनक्षेत्रपाल रंजनसिंह परदेशी, सातारा वनक्षेत्रपाल निवृती चव्हाण, नगरसेवक रविंद्र ढोणे, वनपाल विश्वनाथ बेलोशे, वनसमिती उपाध्यक्ष दत्ता किर्दत, सदस्य सोमनाथ जाधव, ज्ञानेश्वर आखाडे, रामचंद्र उंबरकर, सिताराम बादापुरे, दत्ताराम बादापुरे, विठ्ठल कदम, प्रदिप कदम, विजय वेंदे, संगीता आहिरे, सोमनाथ बुढळे, बावीस गाव संघटनेचे अध्यक्ष राम पवार के. के. शेलार, निवृत्त वनपाल श्रीरंग शिंदे, वनरक्षक एस बी शेलार, एस ए शिंगाडे, आर. एन. जाधव आदी मान्यवर उपस्थित होते. प्रमुख मान्यवरांनी पठारावरील दुर्मीळ फुलांची माहिती करून निसर्गचा आनंद घेतला.
जांभळ्या, निळ्या, लाल, गुलाबी, पांढऱया आधी विविधरंगी फुलांना बहर चढु लागला असुन गेंद, तेरडा, निलिमी, चवर, आभाळी, सितेची अस्व, टुथब्रश, सोनकी आबोलिमा, आम्री, रान हळद, रान गवार आदी विविध प्रकारच्या वनसंपदाची फुले बहरली असुन येत्या आठ दहा दिवसात फुलांचे गालीचे सर्वत्र चादर पहायला मिळण्याची स्थिती निर्माण झाली आहे.
फुले पहाण्यासाठी प्रती माणशी 100 रुपये प्रवेश शुल्क वाहन पार्कींग कार 40 बस 60 रुपये पार्कींगस्थळ ते पठार 10 रुपये बस तिकीट गाईडसाठी 100 रुपये आकारले जाणार आहेत.
हंगाम सुरळीत पार पाडण्यासाठी 120 कर्मचाऱयांची वन समितीने नेमणूक केली असुन यातील 15 जण गाईड म्हणुन काम पाहणार आहेत. पिण्याचे पाणी, शौचालय, निवारा शेडची सुविधा निर्माण केली असुन पठारावरील रोडवरून फिरण्यासाठी भाडे तत्वावर सायकल सुविधाही निर्माण करण्यात आली आहे. घाटाई रोड व कास तलाव अशा दोन्ही बाजुला वाहनतळ निर्माण केली आहेत. पहिल्याच दिवशी आलेल्या पर्यटकांनी ऑनलाईन बुकींग होत नसल्याने नाराजी व्यक्त केली. ऑनलाईन साईटला प्रॉब्लेम आल्याने बुकींग होऊ शकली नाही. रविवारपासुन वेब साईट सुरळीत होणार असुन जास्तीत जास्त पर्यटकांनी ऑनलाइन बुकींग करूनच फुलांचा आनंद घेण्यासाठी पठारावर यावे असे वनसमितीच्या पदाधिकाऱयांकडुन सांगण्यात आले.
