7 ते 8 जणांना बसला जबर मार
ठोकर देणाऱ्या खाजगी ट्रॅव्हल्स वाल्याचे पलायन
गुहागर /प्रतिनिधी
गणेशोत्सवासाठी मुंबई नालासोपारा येथून गुहागर तालुक्यातील उमराठ गावामध्ये येणाऱ्या मुंबई चाकरमान्यांच्या एसटीला खाजगी ट्रॅव्हल्सच्या बसने धडक दिल्याने अपघात घडला आहे. यामध्ये 7 ते 8 जणांना डोक्याला व तोंडाला मार बसला असून इतर किरकोळ जखमी आहेत. हा अपघात पिंपर जामसुत रस्त्यावरील जामसुत सीमेवर पहाटे 6.30 वाजता घडला.
मुंबई नालासोपारा येथून गुहागर तालुक्यातील उमराठ गावातील घाडेवाडी व मराठवाडीतील गणेशभक्त चाकरमनी एसटी महामंडळाची स्वतंत्र गाडी करून गावी येत होते. जामसुत पिंपर या मार्गावर जामसुत सीमेवर समोरून येणाऱ्या खाजगी ट्रॅव्हल्सने धडक दिली. चालकाच्या बाजूने धडक दिल्याने झोपेत असलेल्या प्रवाशांना चांगला दणका बसला. एसटीमध्येच समोरील सीटवर आपटल्याने 7 ते 8 जणांना डोक्याला व नाकाला मार बसला आहे. तर इतरांना किरकोळ मार बसला आहे. असे एकूण 17 जणांवर हेदवी प्राथमिक आरोग्य केंद्रामध्ये उपचार सुरू आहेत.
अपघात झाल्यावर ठोकर देणाऱ्या खाजगी ट्रॅव्हल्सच्या चालकाने आपले वाहन घेऊन पलायन केले आहे. सर्व अपघातग्रस्तांना गावातील ग्रामस्थांनी उपचारासाठी हेदवी प्राथमिक आरोग्य केंद्रामध्ये दाखल केले. त्यांच्यावर अधिक उपचारासाठी गुहागर ग्रामीण रुग्णालयातील वैद्यकीय टीम हेदवी प्राथमिक आरोग्य केंद्रात दाखल झाली आहे. याप्रकरणी गुहागर पोलीस ठाण्यामध्ये नोंद करण्यात आली आहे. उमराठ गावचे सरपंच जनार्दन आंबेकर व ग्रामस्थांनी सर्व जखमींची भेट घेऊन विचारपूस केली.
