प्रतिनिधी / म्हापसा
म्हापसा नगरपालिकेच्या नगरसेविका डॉ. नूतन बिचोलकर यांनी भाजपमध्ये प्रवेश केल्याने आता म्हापसा पालिकेचे नगराध्यक्षपद डॉ. बिचोलकर तर उपनगराध्यक्षपदाची माळ विराज फडके यांच्या गळय़ात पडण्याची शक्यता असल्याचे बोलले जात असून याबाबत नगराध्यक्ष शुभांगी वायंगणकर यांना प्रतिक्रिया विचारली असता त्या म्हणाल्या की, आपण नूतन बिचोलकर यांचे पक्षात स्वागत करते व पक्ष मजबूत बनविण्यासाठी अन्य नगरसेवकांनीही भाजपात यावे असे आवाहन केले.
त्या पुढे म्हणाल्या की, आपणास यबाबत मुख्यमंत्री डॉ. प्रमोद सावंत, प्रदेशाध्यक्ष सदानंद शेट तानावडे वा अन्य कुणी काहीच कल्पना दिली नाही. आपल्याकडे आमदारही बोलले नाही तसे काहीच झालेले नाही असे सांगून नूतन बिचोलकर यांचे फक्त स्वागत झालेले आहे. यासाठी एक वर्षाचा करार होता खरा मात्र त्याबाबत पुढे काहीच बोलणी झालेली नाही. भाजपचा आपल्यास पूर्ण विश्वास आहे. मुख्यमंत्री, प्रदेशाध्यक्ष व आमदार आपला कधीही विश्वासघात करणार नाही असे नगराध्यक्ष शुभांगी वायंगणकर म्हणाल्या.
दरम्यान एका नगरसेवकांनी दिलेल्या माहितीनुसार स्वातंत्र्य दिनाच्या दुसऱया दिवशी म्हणजे 16 ऑगस्टला नगराध्यक्ष शुभांगी वायंगणकर व उपनगराध्यक्ष शेखर बेनकर हे दोघेही आपल्या पदाचा राजीनामा देणार असून त्याजागी नगराध्यक्षपदी डॉ. नूतन बिचोलकर तर उपनगराध्यक्ष विराज फडते यांची वर्णी लागण्याची शक्यता आहे तर म्हापसा मार्केट अध्यक्षपदी आशीर्वाद खोर्जुवेकर यांची नियुक्ती होण्याची शक्यता आहे.
