दोघेही सांकवाळ – वास्को येथील : एकाचा मृतदेह सापडला, दुसऱयाचा शोध सुरु
प्रतिनिधी /वाळपई
सत्तरी तालुक्यातील सावर्डे पंचायत क्षेत्रात येणाऱया काजरेघाट धबधब्यावर वास्को येथील दोन तरुण बुडाल्याची दुर्दैवी घटना घडली. पैकी एकाचा मृतदेह सापडला असून दुसऱयाचा शोध रात्री उशिरापर्यंत पोलीस व अग्निशामक दलाची यंत्रणा करीत होती. सदर घटना सोमवारी सायं. 4 वा.च्या सुमारास घडली.
पावसाळी सहलीसाठी वास्को येथून एकूण आठ तरुण काजरेघाट धबधब्यावर आले होते. सर्वजण आंघोळ करीत असताना शशी सोमनाळ (18, रा. सांकवाळ – वास्को) व गौरव सिंग (19, रा. सांकवाळ वास्को) दोघे अचानकपणे बुडाले.
यामुळे त्यांच्या मित्रांमध्ये खळबळ निर्माण झाली. काही तरुणांनी त्यांना वाचविण्याचा प्रयत्न केला मात्र तो अयशस्वी ठरला.
एकाचा मृतदेह तरंगताना आढळला
सदर घटना जवळपास सायं. 4 वा.च्या सुमारास घडली. उर्वरित तरुणांनी बुडालेल्या मित्रांचा मृतदेह शोधण्याचा प्रयत्न केला. काही वेळानंतर शशी सोमनाथ याचा मृतदेह पाण्यात तरंगताना आढळला. यावेळी त्यांच्या मित्रांनी त्याला पाण्याबाहेर काढले. धबधब्याच्या ठिकाणी मोबाईलची रेंज नाही. यामुळे काही तरुणांनी कुमठोळ येथे येऊन वाळपई पोलीस व अग्निशामक दलाशी संपर्क साधला. त्यांनी त्वरित घटनास्थळी धाव घेतली.
गौरवचा शोध सुरु
सायं. 6 वा.पासून अग्निशामक दलाच्या जवानांनी गौरवच्या शोधार्थ मोहीम हाती घेतली मात्र रात्री उशिरापर्यंत तो सापडला नव्हता. सध्यातरी शोधकार्य बंद करण्यात आले असून सकाळी पुन्हा सुरु करणार असल्याचे सूत्रांनी स्पष्ट केलेले आहे.
दरम्यान, बुडालेले दोन्ही तरुण शांतादुर्गा मंदिरानजीक राहत होते. ते दोघेही सांकवाळ येथील एमइएस महाविद्यालयात शिक्षण घेत होते. वाळपई पोलीस निरीक्षक प्रज्योत फडते यांच्या मार्गदर्शनाखाली पुढील तपास सुरू आहे.
