ऑनलाईन टीम/तरुण भारत
शिवसेनेचे ज्येष्ठ नेते एकनाथ शिंदे (Eknath Shinde) यांच्या बंडखोरीमुळे महाविकास आघाडी धोक्यात आल्यानंतर महाविकास आघाडी सरकारने मंत्रिमंडळाची बैठक घेत मोठे निर्णय घेतले. याबैठकीत औरंगाबाद (Aurangabad) आणि उस्मानाबाद (Osmanabad) शहराच्या नामांतराच्या प्रस्तावाला मंजूरी दिली. त्यानंतर थोड्याच वेळात महाविकास आघाडी सरकारचे मुख्यमंत्री उद्धव ठाकरे (Uddhav Thackeray) यांनी आपल्या पदाचा राजीनामा दिला आणि महाविकास आघाडी सरकार कोसळलं. यांनतर महाराष्ट्रात सत्तांतर झालं असून एकनाथ शिंदे आणि देवेंद्र फडणवीस यांचं सरकार सत्तेत आलं आहे. दरम्यान, आता औरंगाबाद शहराचं नामकरण संभाजीनगर करण्यावरून राज्यातील राजकीय वातावरण तापण्याची चिन्हे दिसत आहेत. नामांतरणावरून एमआयएमचे नेते इम्तियाज जलील (Imtiaz Jaleel) चांगलेच आक्रमक झाले आहेत.
नामकरणाच्या मुद्द्यावरून एमआयएमचे नेते इम्तियाज जलील आक्रमक झाले आहेत. नामांतराला विरोध करण्यासाठी त्यांनी सर्वपक्षीय बैठक घेतली. नामांतरणाचा मुद्दा हा हिंदू-मुस्लिमांचा मुद्दा आहे. आम्ही संभाजी महाराजांचा आदर करतो. पण सत्तेत बसलेल्या पक्षाच्या एका नेत्याने २५-३० वर्षापूर्वी औरंगाबादमध्ये येऊन औरंगाबाद शहराचं नामकरण व्हायला पाहिजे, अशी इच्छा व्यक्त केली. त्या नेत्याची इच्छा पूर्ण करण्यासाठी आम्ही नामांतराचा अन्याय सहन का करायचा? असा प्रश्नही जलील यांनी यावेळी उपस्थित केला.
हे ही वाचा : काली देवीबद्दल वक्तव्य करणाऱ्या महुआ मोईत्रांवर गुन्हा दाखल
पुढे बोलताना जलील म्हणाले, माझ्या जन्माच्या दाखल्यावर औरंगाबाद आहे, त्यामुळे माझ्या मृत्यूच्या दाखल्यावर देखील औरंगाबादच असायला हवं. औरंगाबादच्या नामकरणाच्या वेळी आपण शांत बसलो, तर येणाऱ्या पिढ्या आपल्याला प्रश्न विचारतील, शहराचं नामकरण होतं असताना तुम्ही काय करत होता. त्यामुळे नामकरणाला विरोध झालाच पाहिजे. याप्रकरणी आपण न्यायालयात जाणार असल्याचंही जलील यांनी सांगितलं. याशिवाय गरज पडली तर नामातरणाच्या मुद्द्यावरून रस्त्यावर उतरू, असा इशाराही त्यांनी यावेळी दिला.
दरम्यान जलील यांनी संभाजीनगर मध्ये काही नेत्यांची सभा घेतली. या सभेत आपण सर्व धर्माच्या नेत्यांना, पक्षाच्या नेत्यांनाही पत्र पाठवले आहे. गुरूद्वाराचे अध्यक्ष, ब्राह्मण महासंघाचे अध्यक्ष, आंबेडकरी विचारी चळवळीचे प्रमुख नेते अशा महत्त्वाच्या नेत्यांना पत्र पाठवून सरकारच्या या निर्णयाचा विरोध करण्यास मागणी केली आहे असं त्यांनी यावेळी सांगितलं.
हे ही वाचा : घरगुती गॅस सिलिंडर महागला
