फलटण शहर पोलिसची कारवाई
प्रतिनिधी/ फलटण
दरोडय़ाच्या तयारीत असलेल्या टोळीस शहर पोलिसांनी अटक केली असून तीन जणांना याप्रकरणी अटक करण्यात आली असून दोन जण फरार झाले आहेत. यावेळी संशयित आरोपीकडून धारदार शस्त्र जप्त करण्यात आली आहेत.
शहर पोलीस ठाण्यात मिळालेल्या माहितीनुसार, शहर पोलीस ठाण्याचे पोलीस निरीक्षक भारत किंद्रे यांना पोलीस रेकार्डवरील गुन्हेगार अक्षय बाळकृष्ण माने (रा. दिवाणी हाऊस टोपी चौक फलटण) हा त्याच्या साथीदारासह घातक व धारदार हत्यारे लाठय़ा, काठय़ा घेऊन एका सिल्व्हर रंगाचे वेरना गाडीमधून उपळवे गावाकडे जाणाऱया रोडवरील येणारी-जाणारी वाहनांना अडवून त्यांच्यावर दरोडा टाकणार आहेत व त्यापूर्वी ते मध्यरात्री 1 वाजण्याच्या सुमारास मौजे जाधववाडी येथील साईमंदीराचे समोर एकत्र जमणार असल्याची माहिती मिळाली असता पोलीस निरीक्षक भारत किंद्रे यांनी पोलीस पथक तयार करून समजलेल्या माहितीच्या ठिकाणी साई मंदिर व परिसरात सापळा लावला होता
माहिती मिळालेल्या घटनास्थळी दिनांक 7 रोजी रात्री 1 वाजण्याच्या सुमारास गिरवी रोड बाजूने एक सिल्व्हर रंगाची गाडी ही साईबाबा मंदिराचे आवारात येऊन थांबली असता मिळालेल्या माहितीनुसार गाडी असल्याचे पोलिसांची खात्री झाली होती. पोलीस पथकाने सदर गाडीचे दिशेने जाऊन त्यांचे गाडीला शासकीय गाडी आडवी लावून हत्यारे जवळ बाळगून व दरोडा टाकण्याची पूर्वतयारी करून दरोडय़ाच्या तयारीत असलेल्या सबधितांना ताब्यात घेत असताना गाडीतील पाठीमागे बसलेले दोन जण दरवाजा उघडून अंधारात मंदिराच्या पुर्व बाजूस असणारे अपार्टमेंटमधून पळून गेले. यावेळी तोसिफ उर्फ छोटय़ा अब्दुल शेख (वय-28 वर्षे रा. गजानन चौक फलटण), अक्षय बाळकृष्ण माने (वय-26 वर्षे रा. राम मंदिराशेजारी दिवाणी हाऊस फलटण) व अभिषेक ज्ञानेश्वर महेंद्रे (वय-27 वर्षे रा. आर्यमान हॉटेलच्या पाठीमागे लक्ष्मीनगर फलटण) या तिघांना पोलिसांनी ताब्यात घेतले. तसेच पळून गेलेल्या साथीदारांचे नाव पत्ता विचारता त्यांनी नावे सांगण्यास नकार देऊन उडवाउडवीची उत्तरे दिली. यावेळी झडती घेतली असता एक चाकू, एक तलवार, काठी सिल्व्हर रंगाचे हुंदाई वेरना 1.6 एX गाडी क्र.श्प्.14 अ.1153 असा 8 लाख 12 हजार 550 मुद्देमाल जप्त करण्यात आला. पळून गेलेल्या दोन जणांचा पोलीस शोध घेत असून याप्रकरणी शहर पोलीस ठाण्यात पाच जणांच्या विरोधात गुन्हा दाखल करण्यात आला असून अधिक तपास शहर पोलीस करत आहेत
