सांगली / प्रतिनिधी
सांगली शहरातील कबाडे हॉस्पिटलजवळील बंद घराचा कडीकोयंडा उचकटून चोरट्यांनी रोकडसह दागिने असा ३४ हजारांचा मुद्देमाल चोरून नेला. या प्रकरणी अज्ञाताविरोधात शहर पोलिस ठाण्यात गुन्हा नोंद करण्यात आला. तुकाराम चव्हाण यांनी फिर्याद दिली.
याबाबत पोलिसांनी दिलेल्या माहितीनुसार, फिर्यादी चव्हाण हे कामानिमित्त बाहेर गेले होते. त्यावेळी चोरट्यांनी बंद घराचा कडीकोयंडा उचकटून घरात प्रवेश केला. घरातील लोखंडी पेटीचे कुलूप तोडून ३२ हजारांची रोकड आणि सोन्याचे दागिने असा एकूण ३४ हजारांचा मुद्देमाल चोरून नेला. सायंकाळी घरी परतल्यानंतर चोरीचा प्रकार निदर्शनास आला. त्यानंतर शहर पोलिस ठाण्यात त्यांनी तक्रार दिली आहे. त्यानुसार अज्ञाताविरोधात गुन्हा दाखल करण्यात आला आहे.
