मिरज / प्रतिनिधी
प्रेम विवाह केल्याच्या रागातून योगेश चंद्रकांत लवाटे वय 28 ( रा. सुभाषनगर, बारगाले प्लॉट) या तरुणांवर अज्ञात हल्लेखोरांनी धारदार हत्यारांनी हल्ला करून गंभीर जखमी केले आहे. जखमी योगेश याला मिरजेतील खाजगी रुग्णालयात दाखल करण्यात आले आहे.
योगेश याने दीड महिन्यांपूर्वी भडकंबे (ता. वाळवा) येथील तरुणीशी प्रेमविवाह केला होता. त्यावरून दोन दिवसांपूर्वी दोन्ही कडील नातेवाईकांमध्ये वाद झाला होता. गुरुवारी रात्री साडे आठ वाजता मोटारसायकल वरून आलेल्या दोघा हल्लेखोरांनी त्याच्यावर धारदार शस्त्राने हल्ला करून पळ काढला. गंभीर जखमी योगेशाला त्याच्या मित्रांनी खाजगी रुग्णालयात उपचारासाठी दाखल केले असून त्याच्यावर उपचार सुरु आहेत. याबाबत योगेशच्या काकू वैशाली लवाटे यांनी अज्ञात हल्लेखोरां विरोधात तक्रार दिली आहे.
