अभिनेता शाहिद कपूरचा आगामी चित्रपट ‘जर्सी’चे नवे पोस्टर समोर आले आहे. शाहिदने स्वतः सोशल मीडियावर चित्रपटाचे नवे पोस्टर चाहत्यांसोबत शेअर केले आहे. पोस्टरच्या कॅप्शनमध्ये त्याने ‘एक पिता म्हणून ‘जर्सी’चे हे माझे सर्वात पसंतीचे पोस्टर आहे’ असे म्हटले आहे. जर्सीचे हे नवे पोस्टर पितापुत्राच्या संबंधांना दर्शविणारे आहे. पोस्टरमध्ये शाहिद कपूर साकारत असलेली व्यक्तिरेखा त्याच्या मुलाचे शूलेस बांधताना दिसून येते.
चित्रपटाची कहाणी एका अशयस्वी क्रिकेटपटूच्या भोवती घुटमळणारी आहे, जो स्वतःच्या मुलाची जर्सी खरेदी करण्यासाठी संघर्ष करत असतो. या चित्रपटात शाहिदसोबत मृणाल ठाकूर आणि पंकज कपूर हे देखील मुख्य भूमिकांमध्ये दिसून येणार आहेत. गौतम तिन्ननुरी यांच्या दिग्दर्शनात तयार झालेला हा चित्रपट 31 डिसेंबर 2021 रोजी चित्रपटगृहांमध्ये प्रदर्शित केला जाणार आहे. हा चित्रपट याचबरोबर नेटफ्लिक्सवरही पाहता येणार आहे.
जर्सी या दाक्षिणात्य चित्रपटाचा हा हिंदी रिमेक आहे. मूळ चित्रपटाला प्रेक्षकांकडून मोठी पसंती मिळाली होती. तसेच हिंदी चित्रपटाच्या ट्रेलरला मोठा प्रतिसाद मिळाल्याने शाहिदचा हा चित्रपट गाजणार असल्याचे मानले जात आहे.
