बीड/प्रतिनिधी
नरेंद्र मोदी देशाचे पंतप्रधान झाल्यापासून त्यांनी एकदाही पत्रकार परिषद घेतलेली नाही. त्यामुळे मोदींवर सर्व स्तरातून चौफेर टीका होत असते. मोदी ७ वर्षे झाले पंतप्रधान पदाच्या खुर्चीवर आहेत. याकालावधीत ते एकदाही पत्रकार परिषद घेत जनतेसमोर आलेले नाहीत. यावरून इरोधी पक्षाने वारंवार मोदींवर टीका केली आहे. मात्र, मोंदीच्या या कृतीवर भाजपच्या खासदार प्रीतम मुंडे यांचं वेगळच म्हणणं आहे. मोदींचा पत्रकार परिषद न घेण्याचा गुणच आपल्याला आवडत असल्याचं प्रीतम मुंडे यांनी म्हटलं आहे. मुंडे यांच्या या विधानावर आश्चर्य व्यक्त केलं जात आहे. मराठवाडा मुक्ती संग्राम दिनाच्या कार्यक्रमात बोलताना प्रीतम मुंडे यांनी हे विधान केलं आहे.
प्रीतम मुंडे यांनी मोदींचा मला सर्वात जास्त आवडणारा गुण म्हणजे त्यांनी गेल्या सात वर्षात एकदाही पत्रकार परिषद घेतली नाही. त्यांनी पत्रकार परिषद घेतली नाही म्हणून त्यांच्यावर टीका झाली. पण ते आपलं काम करत आहेत. आपल्या मार्गावर मार्गक्रमण करत आहेत, असं त्या म्हणाल्या.
मोदींबद्दल चांगलं बोलणारे दहा लोकं असतील तर टीका करणारे चारदोन लोक असतातच. पण त्या टीकेने मोदी विचलीत होत नाहीत. ते आपलं काम करत राहतात, असंही त्या म्हणाल्या.
