ऑनलाईन टीम
राज्यासह देशभरात आज आपल्या लाडक्या बाप्पाचे घरोघरी आगमन होत आहे. मोठ्या उत्साहात आणि कोरोना संसर्गाची खबरदारी घेत नागरिक श्री गणेशाला घरी घेवून जात आहेत. ‘गणपती बाप्पा मोरया, मंगलमूर्ती मोरया’ च्या गजरात संपूर्ण वातावरण मंगलदायी झालं आहे. याच पार्श्वभूमीवर, पंतप्रधान नरेंद्र मोदी यांनी मराठीत ट्विट करत देशवासियांना गणेश चतुर्थीच्या खास शुभेच्छा दिल्या आहेत.
“आपणा सर्वांना गणेश चतुर्थीच्या खूप खूप शुभेच्छा. हा शुभ प्रसंग प्रत्येकाच्या जीवनात सुख, शांती, सौभाग्य आणि आरोग्य घेऊन येवो. गणपती बाप्पा मोरया!”, असं ट्विट पंतप्रधान मोदी यांनी केलं आहे.
दरम्यान, महाराष्ट्राबरोबरच देशभरात विविध ठिकाणी गणेशभक्तांकडून मोठ्या उत्साहात गणेश मूर्तींची प्रतिष्ठापना करण्यास सुरुवात झाली आहे. सकाळपासूनच आपल्या लाडक्या गणरायाच्या आगमनासाठी सर्वांचीच लगबग दिसून येत आहे. गणेशभक्तांच्या उत्साहाला उधाण आलेलं असतानाच दुसरीकडे कोरोनाचा धोका देखील कायम आहे. राज्यात करोना संसर्ग पुन्हा वाढू लागला आहे. त्यामुळे नागरिकांनी उत्सव साजरा करण्यासोबतच सरकारने घालून दिलेल्या सर्व नियमाचं काटेकोरपणे पालन करणं आवश्यक आहे.
