बेंगळूर/प्रतिनिधी
राज्यात कोरोनाच्या दुसऱ्या लाटेत कोरोना पॉझिटिव्ह रुग्णांची संख्या झपाट्याने वाढली. याविषयी बर्‍याच तज्ञांनी म्हटले आहे की कोविड नियमांचे काटेकोरपणे पालन न करणे हे कोरोनाच्या दुसर्‍या लाटेला कारणीभूत ठरणाऱ्या मुख्य कारणांपैकी एक होते. सोमवारपासून अनलॉकचा पुढचा टप्पा सुरू होणार आहे. यावेळी नागरिकांकडून नियमांचे उल्लंघन झाल्यास प्रशासन कारवाई करणार आहे. यासाठी विशेष ५४ पथके तैनात केली जाणार आहेत.
दरम्यान सोमवारपासून अनलॉकचा पुढील टप्पा सुरु होणार असल्याने बेंगळूर पोलीस आणि महानगर पालिका अधिकाऱ्यांनी आरोग्य सुरक्षा प्रोटोकॉलचे उल्लंघन करत असल्याचे आढळून आल्यास अशा नागरिक आणि आस्थापनांवर कडक कारवाई करण्याचा निर्णय घेतला आहे. अनलॉक ३.० च्या टप्प्यात नियमांचे उल्लंघन केल्यास प्रशासन कडक कारवाई करण्याच्या तयारीत आहे. अनलॉक नंतर कोरोना रुग्णांची संख्या पुन्हा वाढू नये यासाठी प्रशासनाने खबरदारी घेण्याचा निर्णय घेतला आहे.
दरम्यान, बीबीएमपी मार्शल आणि पोलिस कर्मचारी यांचा समावेश असलेली एकूण ५४ विशेष पथके तैनात केली जाणार असून मास्क न घालणाऱ्या आणि सामाजिक अंतर न राखणाऱ्या नागिकांवर कारवाई करतील. तसेच ही पथके दंड आकारू शकतील आणि गुन्हे दाखल करतील. शनिवारी बीबीएमपीचे मुख्य आयुक्त गौरव गुप्ता आणि बेंगळूरचे पोलीस आयुक्त कमल पंत यांच्या समवेत झालेल्या समन्वय बैठकीत यासंदर्भातील कृती आराखडा तयार करण्यात आला.
दरम्यान, अनलॉक ३.० नंतर, रस्त्यावर अधिक लोक असतील. बरेच लोक मास्क वापरणार नाहीत किंवा ते अयोग्यपणे परिधान करणार नाहीत. अशा लोकांना दंड करण्यात येईल, ज्याप्रकारे यापूर्वी कारवाई केली गेली आहे. ”वरिष्ठ पोलीस अधिकारी यांनी दिलेल्या माहितीनुसार पोलीस आणि बीबीएमपी या दोघांनी आतापर्यंत नियमांचे उल्लंघन करणार्‍यांकडून सुमारे २६ कोटी रुपयांचा दंड वसूल केला आहे, असे ते म्हणाले.
