पुणे / वार्ताहर :
परदेशात व्यवसाय सुरू करण्याच्या बहाण्याने जादूटोणा करुन रास्ता पेठ परिसरातील एका चप्पल दुकानदाराची 90 लाख 75 हजार रुपयांची फसवणूक करण्यात आली. याप्रकरणी 6 जणांवर समर्थ पोलीस ठाण्यात फसवणुकीचा गुन्हा दाखल करण्यात आला आहे.
नादीर अब्दुल हुसैन हसन अली नईमाआवादी (वय 40, रा. कॅम्प, पुणे), सीमा नादीर नईमाआवादी (35), मौलाना शोऐब मैनुद्दीन अत्तार (35, रा. बोपोडी, पुणे), माजीद उस्मान आत्तार (50), खालीद मैनुद्दीन आत्तार (40) व इरम शोऐब आत्तार (32, रा. बोपोडी, पुणे) अशी गुन्हा दाखल झालेल्या आरोपींची नावे आहेत. याप्रकरणी शेख अब्दुल बासीत अब्दुल लतिफ (45, रा. कोंढवा, पुणे) यांनी फिर्याद दिली आहे. 29 ऑगस्ट 2020 ते 19 ऑगस्ट 2022 यादरम्यान घडलेला आहे.
पोलिसांनी दिलेल्या माहितीनुसार, आरोपी नादीर नईमाआवादी, सीमा नईमाआवादी व मौलाना आत्तार यांचा इम्पोर्ट व्यवसाय नाही हे इतर आरोपींना माहिती असून देखील त्यांनी फसवणुकीच्या उद्देशाने आपसात संगनमत करुन कट रचला. तक्रारदार शेख बासीत व त्यांची पत्नी यांचा विश्वास संपादन करुन गुंतवणुकीवर चांगला परतावा देण्याचे आमिष दाखवून गुंतवणूक करण्यास त्यांना भाग पाडण्यात आले. संबंधित तीन आरोपींनी खोटी कागदपत्रे दाखवून सौदी मक्का येथे मोठा व्यवसाय करण्याचे अमिष दाखवून विश्वास संपादन केला. मौलाना शोऐब अत्तार याने जादुटोणा सारखे अघोरी कृत्य करुन त्याकरिता आरोपी नादीर हुसैन अली याने दुजोरा दिला. तक्रारदार यांना गुंगीकारक पाणी पिण्यास लावून तक्रारदार यांचेकडून तावीज बनविण्याकरिता रोख 25 हजार रुपये रोख घेण्यात आले. मात्र, तावीज न देता तक्रारदार यांना वेळोवेळी त्यांच्या इम्पोर्ट, एक्सपोर्टच्या व्यवसायामध्ये गुंतवणूक करण्यास सांगून 90 लाख 75 हजार रुपयांची फसवणूक करण्यात आली. याबाबत पोलीस उपनिरीक्षक एस रणदिवे पुढील तपास करत आहेत.
