पुणे/ प्रतिनिधी :
पंतप्रधान नरेंद्र मोदी यांच्या पुणे दौऱ्याच्या पार्श्वभूमीवर शहरात कडक बंदोबस्त ठेवण्यात येणार आहे. पंतप्रधानांच्या सुरक्षेची जबाबदारी असलेले विशेष सुरक्षा पथक (एसपीजी), फोर्सवनचे जवान बंदोबस्तासाठी तैनात राहणार असून, पाच हजार पोलिसांचा बंदोबस्त तैनात करण्यात येणार आहे.
येत्या 1 ऑगस्ट रोजी पंतप्रधान मोदी हे पुणे दौऱ्यावर असून, ‘लोकमान्य टिळक ट्रस्ट’तर्फे ‘लोकमान्य टिळक राष्ट्रीय पुरस्कार’ देऊन त्यांना सन्मानित करण्यात येणार आहे. स. प. महाविद्यालयाच्या मैदानावर हा कार्यक्रम होणार आहे. त्याचबरोबर पंतप्रधानांच्या हस्ते विविध विकासकामांचे उद्घाटन करण्यात येणार आहे. पंतप्रधानांच्या दौऱ्यानिमित्त पोलीस तसेच प्रशासनाने बंदोबस्ताची आखणी केली आहे. पोलीस आयुक्त रितेश कुमार, सहपोलीस आयुक्त संदीप कर्णिक, अतिरिक्त आयुक्त प्रवीणकुमार पाटील, रामनाथ पोकळे, विशेष शाखेचे उपायुक्त पी. राजा आदींनी बंदोबस्ताची आखणी केली आहे. विशेष सुरक्षा पथकाने पंतप्रधानांच्या सुरक्षेचा आढावा घेतला आहे. हेलिकॉप्टर उतरण्याचे ठिकाण (हेलीपॅड), कार्यक्रमस्थळ, तसेच पंतप्रधानांचा ताफा ज्या मार्गाने जाणार आहे, त्या मार्गाची पाहणी करण्यात आली आहे.
पंतप्रधानांच्या दौऱ्यानिमित्त मंगळवारी (1 ऑगस्ट) शहरातील वाहतूकव्यवस्थेत बदल करण्यात येणार आहे. पंतप्रधान श्रीमंत दगडूशेठ हलवाई गणपती मंदिरात दर्शनासाठी जाणार आहेत. तर स. प. महाविद्यालयाच्या मैदानावर आयोजित कार्यक्रमात ‘लोकमान्य टिळक पुरस्कार’ त्यांना प्रदान करण्यात येणार आहे. या पार्श्वभूमीवर परिमंडळ एकचे पोलीस उपायुक्त संदीपसिंह गिल मध्यभागातील बंदोबस्ताची जबाबदारी सांभाळणार आहेत. स. प. महाविद्यालयात आयोजित करण्यात आलेला कार्यक्रम निमंत्रितासाठी असणार आहे. हा कार्यक्रम ऑनलाइन पद्धतीने पाहण्याची सुविधा उपलब्ध करून देण्यात येणार आहे. शिवाजीनगर पोलीस मुख्यालयातील मैदानावर विविध विकासकामांचे उद्घाटन केले जाणार आहे. पोलीस मुख्यालयातील कार्यक्रम सर्वांसाठी खुला असणार आहे. तेथे दहा हजार जणांसाठी बैठक व्यवस्था उपलब्ध करून देण्यात येणार आहे.
