रत्नागिरी :
‘लाडकी बहीण’ योजनेचा मागील वर्षातील डिसेंबर व जानेवारीमधील हप्ता हा दोन्ही महिन्यांच्या अखेरच्या आठवड्यात जमा करण्यात आला होता. त्यामुळे फेब्रुवारी महिन्याचा हप्ताही अशाच प्रकारे महिना अखेर जमा होईल, अशी अपेक्षा होती. पण फेब्रुवारी महिन्याचा हप्ता अद्याप जमा झालेला नसल्याने जिल्ह्यातील सुमारे ४ लाख १७ हजार ‘लाडक्या बहिणीचे डोळे बँकांमधील जमा होणाऱ्या हप्त्याच्या मेसेजकडे वेधले आहेत.
मुख्यमंत्री लाडकी बहीण योजनेतून जिल्ह्यातील सुमारे ४ लाख १७ हजार लाडक्या बहिणींना महिन्याला सुमारे ६१ कोटी रुपये वाटप होत असते. महायुती सरकारच्या मुख्यमंत्री लाडकी बहीण योजनेला महिलांनी मोठ्या प्रमाणात या योजनेला प्रतिसाद दिला. जुलै २०२४ पासून मुख्यमंत्री लाडकी बहीण योजनेची सुरुवात करण्यात आली होती. राज्यातील नव्या सरकार स्थापनेनंतरही मुख्यमंत्री माझी लाडकी बहीण ही योजना कायम सुरू राहणार आहे, असा विश्वास सरकारकडून व्यक्त करण्यात येत आहे. मात्र, फेब्रुवारी महिन्याचा हप्ता लाडक्या बहिणींच्या खात्यात अद्याप जमा न झाल्याने लाडक्या बहिणी संभ्रमात आहेत. फेब्रुवारी महिन्याचा हप्ता लाडक्या बहिणींच्या खात्यात जमा करण्यासाठी अर्थ विभागाने निधी महिला व बालविकास विभागाकडे वर्ग करण्यात आला. पण काही तांत्रिक कारणांमुळे लाडक्या बहिणींना पैसा देण्यास उशीर झाल्याची माहिती समोर आली आहे. लाडकी बहीण योजनेच्या निकषात न बसणाऱ्या अनेक महिला या योजनेचा लाभ घेत आहेत. अशा महिलांना अपात्र करण्याचे काम आता जिल्हास्तरावरही सुरू आहे. ही पडताळणी अद्याप पूर्ण झालेली नसल्याचे येथील जिल्हा महिला व बालकल्याण विभागामार्फत सांगण्यात आले. लाडकी बहीण योजनेचे निकष लावण्यात येऊन या निकषांनुसार आतापर्यंत राज्यातील लाखो अपात्र महिलांना या योजनेतून वगळण्यात आले आहे. आता लाडक्या बहिणींना फेब्रुवारी व मार्च अशा दोन्ही महिन्यांचा एकत्रित हप्ता दिला जाणार असल्याची माहिती समोर आली आहे. फेब्रुवारी व मार्च महिन्याचे एकूण ३,००० रुपये दिले जाणार असल्याचे सांगितले जातेय. ही रक्कम येत्या ८ दिवसांत पात्र लाडक्या बहिणींच्या बँक खात्यात थेट जमा करण्यात येण्याची शक्यता वर्तवण्यात येत आहे.
