वृत्तसंस्था /नवी दिल्ली
मागील काही दिवसांपासून दोन हजाराच्या नोटा परत करण्याची प्रक्रीया सुरु होती. परंतु त्याची मुदत 7 ऑक्टोबर 2023 रोजी समाप्त झाली आहे. यामुळे ज्यांच्याकडे दोन हजाराची नोट उपलब्ध आहे त्यांना आता पोस्टाद्वारे भारतीय रिझर्व्ह बँक (आरबीआय) यांच्याकडे ती पाठविण्याची सुविधा उपलब्ध होणार आहे. यामध्ये दोन हजार रुपयांच्या नोटा संबंधीतांच्या बँक खात्यात जमा करण्यासाठी विमा पोस्टाद्वारे रिझर्व्ह बँकेच्या नियुक्त प्रादेशिक कार्यालयांना पाठवता येऊ शकतात. आरबीआयच्या प्रादेशिक कार्यालयापासून दूर राहणाऱ्यांसाठी हा एक सुलभ पर्याय म्हणून उपलब्ध होणार असल्याचेही आरबीआयने म्हटले आहे.
आरबीआयचे प्रादेशिक संचालक रोहित पी म्हणाले, ‘आम्ही ग्राहकांना सर्वात सोयीस्कर आणि सुरक्षित पद्धतीने त्यांच्या खात्यात थेट जमा करण्यासाठी विमा उतरवलेल्या पोस्टद्वारे आरबीआयकडे 2,000 च्या नोटा पाठवण्यास प्रोत्साहित करत आहोत. हे त्यांना नियुक्त शाखांमध्ये जाण्याचा आणि रांगेत उभे राहण्याचा त्रास वाचवेल.’ टीएलआर आणि विमापोस्ट दोन्ही पर्याय अत्यंत सुरक्षित आहेत आणि या पर्यायांबद्दल लोकांच्या मनात कोणतीही भीती नसावी. एकट्या दिल्ली कार्यालयाला आतापर्यंत सुमारे 700 टीएलआर फॉर्म मिळाले आहेत. आरबीआय आपल्या कार्यालयात एक्सचेंज सुविधेव्यतिरिक्त या दोन पर्यायांचा पुन्हा समावेश करत असल्याचेही सांगितले आहे. 19 मे रोजी आरबीआयने 2,000 रुपयांच्या नोटा चलनातून काढून घेण्याची घोषणा केली होती. लोकांना या नोटा बँकांमध्ये जमा करण्याची आणि इतर मूल्यांच्या नोटांसह बदलण्याची सुविधा देण्यात आली. आरबीआयच्या म्हणण्यानुसार, अशाप्रकारे 19 मे 2023 पर्यंत चलनात असलेल्या 2,000 रुपयांच्या एकूण नोटांपैकी 97 टक्क्यांहून अधिक नोटा आता परत आल्या आहेत. या नोटा बदलून देण्याची किंवा बँक खात्यात जमा करण्याची अंतिम मुदत आधी 30 सप्टेंबर होती. नंतर ही मुदत 7 ऑक्टोबरपर्यंत वाढवण्यात आली होती.
