वृत्तसंस्था/ चेन्नई
आयपीएलमध्ये महेंद्रसिंग धोनीच्या नेतृत्वाखालील संघ यावेळी गुणतालिकेत पहिल्या क्रमांकावर पोहोचला आहे. चेन्नईने सातपैकी पाच सामने जिंकले आहेत, तर दोनमध्ये पराभव पत्करावा लागला आहे. पण चेन्नईच्या या खेळात त्यांचे 30 कोटींचे खेळाडू अपयशी ठरले असून केवळ 20 लाखांचा खेळाडू चमकला आहे.
चेन्नईने त्यांचा स्टार खेळाडू दीपक चहरसाठी 14 कोटी रुपये दिले, पण तो मोसमाच्या मध्यभागी जखमी झाला आणि आता तो बेंचवर बसला आहे. याचवेळी चेन्नईने बेन स्टोक्ससाठी 16.25 कोटी रुपये खर्च केले. स्टोक्सलाही दुखापत झाली असून तो सध्या बाहेर आहे. दीपक असता तर संघाची गोलंदाजी मजबूत झाली असती, पण तो सध्या संघात नाही. स्टोक्समुळे संघ मजबूत होईल. पण ते दोघेही खेळत नाहीत. त्याचवेळी 20 वर्षीय मथिसा पथिराना या दोघांची उणीव भरुन काढत आहे. या युवा गोलंदाजाने चेन्नईसाठी अप्रतिम गोलंदाजी करत त्यांना सामने जिंकून दिले आहेत. रॉयल चॅलेंजर्स बंगळूरविरुद्धच्या महत्त्वाच्या वेळी त्याने शेवटचे षटक टाकले आणि चेन्नईला विजय मिळवून दिला. या सामन्यात त्याने 42 धावा देत दोन विकेट घेतल्या.
पथिरानाची अॅक्शन श्रीलंकेचा महान वेगवान गोलंदाज लसिथ मलिंगासारखीच आहे आणि त्यामुळे त्याला खेळणे फलंदाजांसाठी त्रासदायक ठरत आहे. पथिरानाला त्याच्या चेंडूंनी धावा कशा रोखायच्या हे देखील माहीत आहे. या मोसमात पथिरानाने आपला दुसरा सामना सनरायजर्स हैदराबादविरुद्ध खेळला. या सामन्यात त्याने चार षटकात 22 धावा देत एक विकेट घेतली. त्याने कोलकाता नाईट रायडर्सविरुद्धही शानदार गोलंदाजी करत कमी धावा दिल्या. त्याने चार षटकात 27 धावा देत एक विकेट घेतली. या मोसमात आतापर्यंत पथिरानाने एकूण तीन सामने खेळले असून चार विकेट घेण्यात तो यशस्वी ठरला आहे. आपल्या गोलंदाजीने त्याने धोनीचा विश्वास जिंकला आहे.
