उचगाव / वार्ताहर
उचगाव ता.करवीर पैकी मणेरमळा येथे हुंकार कॉलनी येथे बंद घराचे कुलूप तोडून घरातील लोखंडी कपाटातून दोन लाख दहा हजार रुपयांच्या सव्वा पाच तोळ्याचे सोन्याचे दागिन्यांचा मुद्देमाल अज्ञात चोरट्याने लंपास केला. ही चोरीची घटना सोमवारी पहाटे घडली.
याबाबत गुरुदास तानाजी बुचडे (वय ३५ रा.हुंकार कॉलनी मणेरमळा उचगाव) यांनी गांधीनगर पोलिसांत फिर्याद दिली. दरम्यान हुंकार कॉलनी तसेच बालाजी पार्क मणेर मळा येथे आणखीन तीन ठिकाणी चोरीचा प्रयत्न झाला असून त्याबाबत अद्याप पोलीस ठाण्यामध्ये नोंद झालेली नाही.
गुरुदास बुचडे हे कुटुंबासमवेत परगावी गेले होते. अज्ञात चोरट्याने याचा फायदा घेत बंद घराचे कुलूप तोडून घरातील लोखंडी कपाटातून सोन्याचे कडे, चेन, अंगठ्या असा दोन लाख दहा हजार रुपयांचा मुद्देमाल अज्ञात चोरट्याने लंपास केला. बुचडे हे परगावहून घरी परतल्यानंतर त्यांना चोरीचा प्रकार लक्षात आला . त्यानंतर त्यांनी गांधीनगर पोलीस ठाण्यात चोरीची फिर्याद दिली. गांधीनगर पोलीस ठाण्यात चोरीचा गुन्हा नोंद झाला आहे. अधिक तपास सहाय्यक पोलीस निरीक्षक सत्यराज घुले करीत आहेत.
