पुणे : नोव्हेंबरमध्ये महावितरणच्या भरारी पथकाने पुणे प्रादेशिक विभागात 3 कोटी 56 लाख 60 हजार रुपयांची 175 वीज चोरीची प्रकरणे उघडकीस आणली. त्यामुळे वीज चोरांचे धाबे दणाणले आहेत. उघडकीस आणलेल्या वीज चोरीमध्ये मोठया प्रमाणात औद्योगिक व व्यावसायिक ग्राहकांचा समावेश आहे.
नोव्हेंबरमध्ये पुणे ग्रामीण भागातील उरुळीकांचन परिसरात रात्रीच्यावेळी भरारी पथकाने धाड टाकुन पेट्रोल पंपाची वीजचोरी उघडकीस आणली. या ग्राहकास 90 हजार 179 युनिटचे 19 लाख 42 हजार 182 रूपयांचे वीजचोरीचे बील देण्यात आले आहे. दुसऱया प्रकरणात पुणे शहर भागातील 80 केडब्ल्यु जोडभार असलेल्या व्यावसायिक ग्राहकाची वीजचोरी पकडण्यात आली. सदर व्यावसायिक ग्राहकाने मीटरच्या आधी एल.टी. केबलला टॅप करून मीटर बायपास करून वीजचोरी केली होती. या ग्राहकाने 80 हजार 438 युनिटसची चोरी केल्याचे तपासात उघड झाले असून, त्यांना 28 लाख 14 हजार रूपयांचे वीजचोरीचे बील देण्यात आले आहे.
तिसऱया प्रकरणात कोल्हापूरमधील इचलकरंजी भागातील 91 एच.पी. जोडभार असलेल्या औद्योगिक ग्राहकाची वीजचोरी उघडकीस आली. या औद्योगिक ग्राहकाने मीटरमध्ये छेडछाड करून वीजचोरी केल्याचे तपासात आढळून आले. त्याला 90 हजार 208 युनिटसचे 15 लाख 21 हजार 710 रूपयांचे वीजचोरीचे बील देण्यात आले. चौथ्या प्रकरणात सोलापुरमधील नातेपुते भागातील 60 एच.पी. जोडभार असलेल्या औद्योगिक ग्राहकाची वीजचोरी उघडकीस आली. त्या ग्राहकाने दुसऱया डिस्ट्रीब्युशन ट्रान्सफॉर्मरवरून एल.टी. केबल टाकून मीटर बायपास करून वीजचोरी केली. त्याला 11 लाख 55 हजार 300 रूपयांचे वीजचोरीचे बील देण्यात आले. या चार मोठय़ा वीजचोरीच्या प्रकरणांसह एकूण 175 वीजचोरीची प्रकरणे उघडकीस आली आहेत.
ही वीजचोरीची रक्कम भरण्यासाठी ग्राहकांना नियमानुसार मुदत देण्यात आली असून, विहित कालावधीत या ग्राहकांनी वीजबिलाची रक्कम भरली नाही तर त्यांच्याविरूद्ध विद्युत अधिनियम 2003 नुसार कारवाई करण्यात येणार आहे.
