पुणे / प्रतिनिधी :
सुमारे 150 घरफोडीचे गुन्हे दाखल असलेल्या एका सराईत आरोपीला कोंढवा पोलिसांनी बेड्या ठोकल्या असून, त्याच्याकडून 37 तोळे वजनाचे 22 लाख 20 हजारांचे दागिने जप्त करण्यात आले असल्याची माहिती कोंढवा पोलीस ठाण्याचे वरिष्ठ पोलीस निरीक्षक संतोष सोनावणे यांनी दिली.
संगतसिंग अजमेरसिंग कल्याणी (वय 40, रा. थेऊर रोड, लोणी काळभोर, पुणे) असे अटक करण्यात आलेल्या आरोपीचे नाव आहे. हडपसर, बिबवेवाडी, सासवड, खेड, अलंकार, लोणीकंद, कोथरूड, दत्तवाडी, पंढरपूर, वानवडी पोलीस ठाण्यात त्याच्यावर गुन्हे दाखल असून, या गुन्ह्यात पोलीस त्याचा शोध घेत होते. त्याच्यावर यापूर्वी 150 घरफोडीचे गुन्हे दाखल असून तो मध्यरात्रीच्या सुमारास त्याच्या साथीदारांच्या मदतीने वेगवेगळ्या भागात घरफोडीचे गुन्हे करत होता. परंतु त्याने त्याची गुन्ह्याची पद्धत बदलून मध्यरात्री गुन्हे करण्याचे सोडली व तो दिवसा घरफोड्या करत असल्याचे पोलिसांच्या तपासात समोर आले.
संगतसिंग कल्याणी याने कोंढवा परिसराततील कुबेरा पार्क येथे भर दिवसा घरफोडी केली होती. त्याची ओळख पटू नये म्हणून तो तोंडाला रुमाल बांधून डोक्यावर टोपी घालून गुन्हा करत होता, असे सीसीटीव्ही फुटेजमध्ये दिसून आले. आरोपी हा संबधित गुन्हा करताना कोणत्या मार्गाने आला तसेच गुन्हा केल्यानंतर कोणत्या मार्गाने गेला, या अनुषंगाने पोलिस अंमलदार सुहास मोरे राहुल थोरात, जयदेव भोसले, राहुल राजगे, सीसीटीव्ही पाहून शोध घेत होते. त्यांनी सुमारे 200 सीसीटीव्हीची पाहणी करून आरोपीचा माग काढला. तो थेऊर येथे असल्याची माहिती त्यांना मिळाली. त्यानुसार कल्याणी याला त्याच्या राहत्या घरी पकडण्यासाठी पोलीस पथक गेले होते. पोलिस आल्याची चाहूल लागताच त्याने घराचा दरवाजा लावून घेतला व पोलिसांना चार ते पाच तास ताटकळत ठेवले. तो मागील दरवाजाने पळून जाण्याच्या तयारीत होता. परंतु पोलिसांनी त्याच्या घराला चारही बाजूने घेरून सापळा रचला. नंतर शर्थीचे प्रयत्न करून त्याला पोलिसांनी ताब्यात घेत अटक केली. पोलिस उपायुक्त विक्रम देशमुख यांच्या मार्गदर्शनाखाली वरिष्ठ पोलिस निरीक्षक संतोष सोनवणे, गुन्हे निरीक्षक संजय मोगले, संदीप भोसले, सहायक पोलीस निरीक्षक अनिल सुरवसे, अंमलदार अमोल हिरवे, विकास मरगळे, राहुल वंजारी यांच्या पथकाने ही कारवाई केली.
