Chiplun Crime News : गणेशोत्सवाची सर्वत्र धामधूम सुरू असतानाच शहरातील मध्यवर्ती भागातील भोगाळे येथील युनियन बॅंकेचे एटीएम फोडून चोरट्यांनी तब्बल १४ लाखांची रोख रक्कम लंपास केली. यामुळे शहरात खळबळ उडाली आहे.युनियन बॅंकेकडून या बाबतची तक्रार गुरुवारी चिपळूण पोलीस ठाण्यात दिल्यानंतर चोरट्यांच्या विरोधात गुन्हा दाखल झाला आहे. उपविभागीय पोलीस अधिकारी सचिन बारी, पोलीस निरीक्षक रवींद्र कदम घटनेची पाहणी केली असून पुढील तपास सुरु आहे.
भोगाळे येथे युनियन बॅंकेच्या शाखेच्या परिसरातच बॅंकेचे एटीएम सेंटर आहे. बुधवारी गणेशोत्सवानिमित्त बॅंकेला सुट्टी होती. त्याची संधी साधून चोरट्यांनी पहाटे ४ वाजता एटीएम फोडले. गुरूवारी सकाळी हा प्रकार उघड झाल्यानंतर बॅंंकेकडून या बाबतची माहिती चिपळूण पोलीस ठाण्यात देण्यात आली.
पोलिसांसमोर तपासाचे आव्हान
पोलिसांनी गुन्हा नोंद करून परिसरातील सीसीटीव्ही फुटेज ताब्यात घेतलेअसून, पुढील तपास सुरू केला आहे. मागील काही वर्षे एटीएम फोडून चोरी करण्याचे प्रकार थांबले होते. मात्र गणेशोत्सवात हा प्रकार घडल्यामुळे पोलिसांसमोर तपासाचे आव्हान उभे आहे.
