पोलिसांवर हल्ला प्रकरणी 11 जणांची निर्दोष मुक्तता

बेळगाव : पोलीस अधिकाऱ्यांवर हल्ला केल्याच्या आरोपावरून रमाकांत कोंडुसकर यांच्यासह 11 जणांची येथील प्रथम वर्ग न्यायदंडाधिकारी तृतीय न्यायालयाने निर्दोष मुक्तता केली आहे. न्यायाधीश पल्लवी पाटील यांनी यासंबंधीचा निकाल दिला आहे. रमाकांत कोंडुसकर (रा. गांधीनगर), अभिजित भातकांडे (रा. पाटील मळा), रवि कोकितकर (रा. हिंडलगा), परशराम देसाई (रा. कॅम्प), सचिन उर्फ निग्रो चव्हाण (रा. गांधीनगर), बाळू पवार (रा. अनगोळ), सुनील कुरणकर (रा. शहापूर), कपिल भोसले (रा. कपिलेश्वर रोड), विलास कंग्राळकर (रा. फुलबाग गल्ली), प्रसाद अमृजकर (रा. तांगडी गल्ली), अनिल मुरकुटे (रा. कपिलेश्वर रोड) यांची निर्दोष मुक्तता करण्यात आली आहे. 1 एप्रिल 2012 रोजी रात्री खडेबाजारचे तत्कालिन पोलीस निरीक्षक शंकरगौडा पाटील व त्यांचे सहकारी बंदोबस्तावर असताना हुतात्मा चौक परिसरात लव्ह जिहादच्या नावाने गोंधळ सुरू होता. पोलीस अधिकारी त्यांना समजावण्यासाठी गेले असता त्यांच्यावर हल्ला करून सरकारी कामात अडथळे आणल्याचा आरोप ठेवत खडेबाजार पोलीस स्थानकात एफआयआर दाखल करण्यात आले होते. या प्रकरणातून 11 जणांची न्यायालयाने निर्दोष मुक्तता केली आहे. आरोपींतर्फे अॅड. प्रताप यादव, अॅड. हेमराज बेंचन्नवर, अॅड. स्वप्नील नाईक, अॅड. निखील कुलकर्णी आदींनी काम पाहिले.