पुणे / वार्ताहर :
L&T कंपनीने भाडेतत्वावर घेतलेल्या साहित्याची परस्पर विल्हेवाट लावून प्रोजेक्ट डायरेक्टरने 1 कोटी 34 लाख 78 हजार 164 रुपयांची फसवणूक केली आहे. तर जनरल स्ट्रक्चर मॅनेजरने चढय़ा दराने देयक मंजूर करून कंपनीची 47 लाख 9 हजार 561 रुपयांची फसवणूक केल्याप्रकरणी चंदननगर पोलीस ठाण्यात गुन्हा दाखल करण्यात आला आहे.
याप्रकरणी राहुल सुबीर बॅनर्जी (वय 46, रा. ठाणे) यांनी चंदननगर पोलीस ठाण्यात फिर्याद दिली आहे. त्यानुसार प्रोजेक्ट डायरेक्टर विजयकुमार माथनकुमार (रा. खराडी), स्ट्रक्चरल मॅनेजर बसवराज चन्नागी यासह इतर 2 जणांवर गुन्हा दाखल करण्यात आला आहे. ही घटना जानेवारी 2019 ते आजपर्यंतच्या काळात घडली आहे.
पोलिसांनी दिलेल्या माहितीनुसार, फिर्यादी हे L&T कंपनीचे जनरल मॅनेजर सिक्युरिटी आहेत. L&T कंपनीने कन्स्ट्रक्शन कामासाठी लागणारे साहित्य हे भाडेतत्वावर घेतले होते. विजयकुमार माथनकुमार यांना हे माहित असताना सुध्दा पदाचा गैरवापर करून भाडेतत्वार घेतलेल्या साहित्याचे इतर सहकाऱ्यांच्या मदतीने विल्हेवाट लावून कंपनीचे 1 कोटी 34 लाख 78 हजार 164 रुपयांचे नुकसान केले. तसेच मशीन घेऊन व्हेंडर, सब कॉन्ट्रक्टरची बिले चुकीच्या पद्धतीने मंजूर करून कंपनीचे नुकसान केले.
तर बसवराज चन्नागी हे कंपनीत स्ट्रक्चरल मॅनेजर म्हणून कामाला होते. बसवराज चन्नागी हा कंपनी आणि व्हेंडर, सबकॉन्ट्रँक्टर यांच्यामधील दुवा होता. बसवराज चन्नागीने साईटवर कंपनीच्या पॉलिसीप्रमाणे काम न करता स्वतःच्या फायद्याकरता ओरिएण्टल रेल इन्फास्ट्रक्चर प्रा. लि. व टेक्नोक्रॅफ्ट इंडस्ट्री या रजिस्टर व्हेंडरच्या वर्क ऑर्डरला मंजुरी देऊन त्यांना चढय़ा दराने देयक मंजूर करून त्या बदल्यात कमिशन म्हणून पत्नीच्या फर्मच्या बँक खात्यावर 47 लाख 9 हजार 561 रुपये घेऊन कंपनीची फसवणूक केली. पुढील तपास गुन्हे शाखेच्या युनिट 4 चे पोलीस उपनिरीक्षक जयदीप पाटील करत आहेत.
