शक्ती योजनेमुळे लाखो भाविकांकडून सढळ हस्ते दान
वार्ताहर /बाळेकुंद्री
कर्नाटक, महाराष्ट्र व गोवा राज्यांतील लाखो भाविकांचे श्रद्धास्थान असलेल्या सौंदत्ती येथील यल्लम्मा देवी मंदिराची दानपेटी खोलण्यात आली. भक्तांनी 1 कोटी 37 लाखांहून अधिक रकमेचे दान रेणुकाचरणी अर्पण केले आहे. दोन दिवसांपासून सुरू झालेली मोजणी बुधवारी पूर्ण झाली. या दानपेटीतील दानाची मोजणी भाविकांच्या उपस्थितीत ईन पॅमेरा करण्यात आली. यासाठी यल्लम्मा मंदिराचे शासनाधिकारी व जिल्हाधिकारी व संबंधित देवस्थानचे कार्यनिर्वाहक अधिकारी एसबीपी महेश यांनी दानपेटी खोलली. या दानपेटीतील रक्कम व मौल्यवान दागिने मोजण्यात आले. दानपेटीत एकूण 1 कोटी 37 लाख रुपये व चार लाख 44 हजारांचे सोने, अडीच लाख रु. किमतीची चांदी आढळून आली. गेल्या 44 दिवसांपासून भाविकांनी दान केलेली रक्कम, सोन्या-चांदीचे दागिने मोजण्याचे काम बुधवारी पूर्ण झाले. देवस्थानचे कार्यनिर्वाहक अधिकारी एसबीपी महेश यावेळी म्हणाले, मे आणि जूनमध्ये यल्लम्मा मंदिराला भेट दिलेल्या भाविकांनी 1 कोटी 37 लाख रुपये देवीच्या चरणी अर्पण केले आहेत. सरकारच्या शक्ती योजनेमुळे देणगीचे प्रमाण वाढले आहे. ही रक्कम रिंगरोड आणि वसतिगृहांच्या बांधकामासह भाविकांना पायाभूत सुविधा देण्यासाठी वापरण्यात येणार आहे. यावेळी व्यवस्थापन समिती सदस्य वाय. वाय. काळप्पनावर, अभियंता ए. बी. मुळ्ळूर, श्रम खात्याचे साहायक आयुक्त बसवराज जिरग्याळ आदी मान्यवर उपस्थित होते.
