मुंबई \ ऑनलाईन टीम
1 मेपासून सुरु होणाऱ्या 18 वर्षांवरील सर्व नागरिकांच्या लसीकरणासाठी नोंदणी करणे गरजेचे आणि तितकेच महत्त्वाचे आहे. ही नोंदणीप्रक्रिया आज संध्याकाळी 4 वाजल्यापासून सुरु होणार आहे. केंद्र सरकारने यापूर्वी लसीकरणासाठीच्या नोंदणीची वेळ जाहीर केली नव्हती. आता या नोंदणीची वेळ आरोग्य सेतू या ऑफिशिअल ट्विटर हँडलवरुन जाहीर करण्यात आली आहे.
28 एप्रिल रोजी कोरोना प्रतिबंधक लसीकरणासाठीची नोंदणी सुरू होईल असे केंद्र सरकारने यापूर्वी जाहीर केले होती. मात्र,सरकारकडून नोंदणीप्रक्रिया सुरु होण्याची वेळ अद्याप जाहीर करण्यात आली नव्हती. त्यामुळे अनेक लोक रात्री बारा वाजल्यापासून नोंदणी करण्याचा प्रयत्न करत होते. मात्र नोंद होत नव्हती.
आरोग्य सेतू या ऑफिशिअल ट्विटर हँडलवरुन आता या नोंदणीप्रक्रियेची माहिती देण्यात आली आहे. या ट्विटमध्ये म्हटले आहे की, “18 वर्षांवरील सर्व नागरिकांच्या लसीकरणासाठीची नोंदणी http://cowin.gov.in या वेबसाईटवर तसंच आरोग्य सेतू आणि उमंग या अॅप्सवर 28 एप्रिल म्हणजे आज संध्याकाळी 4 वाजल्यापासून सुरु होणार आहे. 1मेपासून किती सरकारी आणि खासगी लसीकऱण केंद्रे लसीकरणासाठी सज्ज आहेत त्यानुसार नागरिकांना लसीकरणासाठीची वेळ देण्यात येईल”.
