हसवणाऱया ‘पृथ्वीक’वर रडण्याची वेळ

‘महाराष्ट्राची हास्यजत्रा’ हा सोनी मराठीवरील कार्यक्रम घराघरात प्रसिद्ध आहे. महाराष्ट्राला पोट धरुन हसवणाऱया या कार्यक्रमाचे लाखो चाहते आहेत. विशेष म्हणजे या कार्यक्रमातील अनेक विनोदी कलाकारांनी त्यांची एक वेगळी ओळख निर्माण केली आहे. मात्र याच कार्यक्रमातील एका विनोदी कलाकाराला लुटण्याचा प्रयत्न झाल्याची धक्कादायक घटना समोर आली आहे. या कलाकाराने फेसबुक पोस्ट लिहित याबाबतची माहिती दिली. या कार्यक्रमातील विनोदी कलाकार पृथ्विक प्रताप याच्यासोबत ही संपूर्ण घटना घडली. शुक्रवारी 21 जानेवारीला पृथ्विक हा शूटींग संपल्यानंतर घरी निघाला होता. त्यावेळी एका रिक्षावाल्याने त्याला लुटण्याचा प्रयत्न केला. मात्र वेळीच पोलीस धावून आल्याने तो सुखरुप बचावला, असे त्याने पोस्टमधून सांगितले आहे. हा प्रसंग नेमका कसा घडला याबाबत त्याने सविस्तर फेसबुक पोस्ट शेअर केली आहे. विशेष म्हणजे याद्वारे त्याने मुंबई पोलिसांचे आभारही मानले आहेत. कलाकारांना गंडा घालण्याचे प्रकार यापूर्वीही झाले आहेत आणि कोणताही कमीपणा न मानता कलाकार आपले अनुभव शेअर करत असतात. यामध्ये अभिनेता स्वप्नील जोशी, गौतमी देशपांडे, अमृता धोगडे यांनाही फसवणुकीचे अनुभव आले आहेत आणि इतरांनी सावध व्हावे म्हणून त्यांनी अनुभव शेअर केले आहेत.