स्काऊट गाईडचे जिल्हा मुख्यालय आयुक्त अरविंद जावळे कालवश

प्रतिनिधी / गोडोली

भारत स्काऊट आणि गाईड जिल्हा कार्यालयाचे मुख्यालय आयुक्त तथा जेष्ठ लीडर ट्रेनर अरविंद शंकरराव जावळे यांचे नुकतेच अल्पशा आजाराने निधन झाले.

जिल्हा परिषद प्राथमिक शाळेतील प्राथमिक शिक्षक, तालुका मास्तर, होमगार्डचे जिल्‍हा समादेशक ते स्काऊट-गाईड जिल्हा संस्थेचे मुख्यालय आयुक्त असा त्यांचा प्रवास झाला. ते हॅम रेडिओचे साताऱ्यातील पहिले ऑपरेटर, राष्ट्रीय प्रशिक्षक, शालेयस्तरावर विविध सामुदायिक विकास कार्यक्रम व सेवा उपक्रम राबविल्यामूळे त्यांना राष्ट्रीय स्तरावरील पंतप्रधान ढाल पुरस्कार, राज्यस्तरीय उत्कृष्ट स्काऊटर” आणि “बार टू मेडल ऑफ मेरीट ” या पुरस्काराने गौरविण्यात आले होते.

मॅपिंग व स्टार गेझिंग,फर्स्ट एड, आपत्ती व्यवस्थापन, सिग्नलींग, मॅसेंजर ऑफ पिस व फ्रि बिईंग मी “असे अनेक राष्ट्रीय स्तरावरील प्रशिक्षणे घेऊन जिल्ह्यातील व राज्यातील अनेक स्काऊटमास्टर व गाईड कॅप्टन शिक्षक – शिक्षिका यांना प्रशिक्षित केले.

कडक शिस्त, करारी आवाज व कामातील तत्परता, शांत, संयमी व प्रेमळ स्वभावाचे ते होते. ते ग्रंथालय मित्र आणि महाराष्ट्र अंधश्रद्धा निर्मूलन समितीचे ते सक्रिय कार्यकर्ते म्हणून ही त्यांची ओळख सर्वदूर आहे. त्यांना वाचनाची प्रचंड आवड असल्याने स्वतःच्या वैयक्तीक ग्रंथालयात विविध विषयांची ग्रंथसंपदा जमविली. मंदीर समजून जिल्हा स्काऊट-गाईड कार्यालयात नियमित उपस्थित राहून दैनंदिन कामकाजात कुठलेही मानधन न घेता मदत करत होते.