प्रतिनिधी / सोलापूर
सोलापुर महापालिकेचे उपायुक्त पदी गेल्या दीड वर्षापासून रिक्त होते. या ठिकाणी स्थानिक निधी वित्त विभागाचे सहायक संचालक धनराज पांडे यांची नियुक्ती गुरुवारी करण्यात आली असल्याची माहिती मनपा आयुक्त पी. शिवशंकर यांनी गुरुवारी दिली.
कोरोनाच्या महामारित सोलापूर महापालिकेच्या उपायुक्त पदाचा पदभार गेल्या दोन महिन्यांपूर्वी जिल्हा प्रशासन अधिकारी पंकज जावळे यांच्याकडे देण्यात आला होता. सध्या कोरोनाच्या काळात शहरातील खासगी रुग्णालयांनी शासन निदेर्शानुसार बिल आकारणी करावी, रुग्णांना तत्काळ बेड उपलब्ध व्हावेत, यासाठी गेल्या तीन महिन्यांपासून स्थानिक निधी वित्त विभागाचे सहायक संचालक धनराज पांडे हे प्रयत्नशील होते. परिणामी त्यांच्याकडे उपायुक्त पदाचा पदभार दिला आहे.
स्थानिक निधी वित्त विभागाचे सहायक संचालक धनराज पांडे गेली तीन वर्षे सोलापुरात कार्यरत आहेत. मार्च अखेर त्यांची बदली होणार होती. कोरोनाचा प्रादुर्भाव झाल्यानंतर महापालिकेच्या कोविड नियंत्रण १९ कक्षाचे प्रमुख म्हणून त्यांची नियुक्ती करण्यात आली. शहरात कोरोनाचा प्रादुर्भाव झाल्यानंतर मनपातील काही अधिकारी काम करायला तयार नव्हते. दीड वर्षापूर्वी उपायुक्तपदी नियुक्त झालेले अभिजित बापट अद्यापही रुजू झाले नाहीत. त्यांच्यावर गुन्हा दाखल करावा लागला.
इतर विभागातील अधिकारी कामास नकार देत होते. खासगी रुग्णालये रुग्णांना दाखल करुन घेण्यास नकार देत होती. या काळात पांडे यांची नियंत्रण कक्षात नियुक्ती करण्यात आली. त्यांनी सर्व गोष्टींना शिस्त लावण्याचे काम नियंत्रण कक्षातून केले. पांडे यांची वित्त विभागातून प्रतिनियुक्तीने महापालिका उपायुक्तपदी बदली व्हावी, यासाठी महापालिका आयुक्त पी. शिवशंकर आणि जिल्हाधिकारी मिलिंद शंभरकर यांनी प्रस्ताव पाठविला होता. त्यानुसार पांडे यांची उपायुक्त पदी नियुक्ती करण्यात आली आहे.
