तरुण भारत संवाद प्रतिनिधी / वैराग
कोरोनाचा प्रसार अतिशय झपाट्याने वाढत असल्याने आज वैराग पोलिस टेशनचे पोलिस निरिक्षक विनय बहिर व वैराग ग्रामसेवक सचिन शिंदे यांनी पथक सोबत घेऊन संपूर्ण वैराग शहरांमध्ये कोरोनाच्या पार्श्वभूमीवर पाहणी केली.
दरम्यान कोविडच्या अनुषंगाने घ्यावयाच्या खबरदारीची उल्लंघन केल्याच्या कारणावरून वैराग येथील नागोबा मंदिर चौकातील एस.के टेलर्स हे दुकान तीस दिवसांसाठी सील केले. या कापड दुकानांमध्ये विक्रेते व काम करणारे कर्मचारी असे मिळून एकूण ११ जण उपस्थित होते. सामाजिक अंतर देखील ठेवले नव्हते, तसेच ग्राहकांपैकी बऱ्याच जणांनी मास्कचा वापर केलेला नव्हता तसेच दुकानांमध्ये सॅनिटायझर देखील उपलब्ध ठेवलेले नव्हते. या कारणास्तव दुकान ३०दिवसांसाठी सील करण्यात आले.
अशाप्रकारे कोरोनाचा संसर्ग रोखण्यासाठी उपाययोजना न करणाऱ्या दुकानदार, व्यापारी, फळ विक्रेते तसेच नागरिकांवर यापुढे कडक कारवाई करण्यात येईल असा इशाराही त्यांनी दिला. दुकानदारांनी, व्यापाऱ्यांनी दुकाने वेळेत बंद करावीत तसेच दुकानांमध्ये विना मास्क कोणालाही प्रवेश देऊ नये. दुकानांमध्ये सामाजिक अंतर राखले जाईल याची खबरदारी घ्यावी तसेच मास्कचा वापर हा अनिवार्य राहील असेही त्यांनी यावेळी सांगितले. हॉटेल व्यवसायिकांनी सायंकाळी आठ वाजेनंतर ग्राहकांना केवळ पार्सल सुविधा उपलब्ध करून द्यावी, अन्यथा कारवाईला सामोरे जावे लागेल. तसेच संपूर्ण वैराग शहरामध्ये पोलीस प्रशासनाकडून वेगवेगळी पथके तयार करण्यात आली असून त्यांच्याद्वारे माननीय जिल्हाधिकारी यांच्या आदेशाचे उल्लंघन करणाऱ्या वर कडक कारवाई करण्यात येणार असल्याचे विनय बहिर यांनी सांगितले.
