प्रतिनिधी / कुर्डुवाडी
रस्त्यावर दुचाकी अडवून कोयत्याचा धाक दाखवून दुचाकीस्वाराकडील २७ हजार ४०० रुपयांची लुट करणाऱ्या तिघांना काही तासातच कुर्डुवाडी पोलिसांनी अटक केली असून अन्य एकजण फरार आहे.
याबाबत पोलिसांनी दिलेल्या माहितीनुसार दि. ५ रोजी फिर्यादी संतोष फरड रा.पडसाळी ता.माढा हे सकाळी ८ वा. सुमारास आपल्या चुलत भावासह महिंसगाव येथे म्हैस आणण्यासाठी निघाले असता कुर्डुवाडी-बार्शी रोडवर परंडा चौकाच्या पुढे काही अंतरावर दोन मोटार सायकलवर चार व्यक्ती येऊन फिर्यादीची मोटारसायकल अडवून त्यांना कोयत्याचा धाक दाखवून, काठीने मारहाण करुन त्यांच्याकडील रोख रक्कम २७ हजार ४०० काढून घेतले.
याबाबत फरड यांच्या फिर्यादीवरुन पोलिसांनी आपल्या तपासाची सूत्रे वेगाने फिरवत काही तासातच या गुन्ह्यातील तीन आरोपी अक्षय पवार वय २०, कृष्णा शिंदे वय १९, समाधान पवार वय २४ यांना अटक केली असून चोरीस गेलेल्या एकूण रोख रकमेपैकी २४ हजार रुपये जप्त करण्यात पोलिसांना यश आले आहे. सदर आरोपींना माढा न्यायालयासमोर हजर केले असता दि. ८ जुलैपर्यंत पोलिस कोठडी सुनावण्यात आली आहे.
या तपास कामी उपविभागीय पोलिस अधिकारी डॉ.विशाल हिरे यांच्या मार्गदर्शनाखाली सहा. पोलिस निरीक्षक चिमणाजी केंद्रे, पोलिस उपनिरीक्षक हनुमंत वाघमारे, पो. हे. कॉ.घाटगे, पो. ना. ठोंगे, पो. ना. मंडलिक, दत्ता सोमवाड आदींनी काम पाहिले.
