पंढरपूर / तरुण भारत संवाद प्रतिनिधी
उसाने भरलेली ट्रॅक्टरची ट्रॉली अंगावर पडून एक जण ठार झाल्याची घटना नारायण चिंचोली ता. पंढरपूर येथे शनिवारी दुपारी चारच्या दरम्यान घडली आहे. महेश बलभीम भोसले (वय 31 रा. तुंगत ता. पंढरपूर) असे मृत व्यक्तीचे नाव आहे.
याबाबत अधिक माहिती अशी की, नारायण चिंचोली नजीक असणाऱ्या कोळेकर, मोटे वस्ती येथील कच्च्या रस्त्याने उसाने भरलेल्या दोन ट्रॉल्या घेऊन ट्रॅक्टर नारायण चिंचोली येथे येत होत्या. कच्च्या रस्त्यावरून पंढरपूर – मोहोळ मार्गावरील डांबरी रस्त्यावर ऊसाने भरलेला ट्रॅक्टर डांबरी रोडवरती चढत होता . यावेळी ट्रॅक्टर चालकास व्यवस्थित वळणं घेता न आल्याने दोन्ही ट्रॉल्या डांबरी रस्त्या व व रस्त्याच्या कडेला कोसळल्या.
या दरम्यान तुंगत येथून पंढरपूर कडे दुचाकीवरून (एम एच 13 सी.एन. 3763) निघालेले महेश बलभीम भोसले यांच्या अंगावर उसाने भरलेली ट्रॉली कोसळली. महेश भोसले अपघातात गंभीर जखमी झाल्याने त्यांना उपजिल्हा रुग्णालय पंढरपूर या ठिकाणी उपचारासाठी दाखल करण्यात आले परंतु यावेळी ते मृत झाल्याचे घोषित करण्यात आले. अपघातानंतर ट्रॅक्टर चालक पळून गेला आहे.
