ऑनलाईन टीम / मुंबई :
अमली पदार्थ विरोधी शाखेने (NCB) हरीश खान नावाच्या ड्रग पेडलरला अटक केली आहे. दिवंगत बॉलिवूड अभिनेता सुशांत सिंह राजपूत ड्रग्ज प्रकरणात ही अटक झाली आहे. वांद्रेमधून हरीश खानला अटक करण्यात आली आहे.
मिळालेल्या अधिक माहितीनुसार, हरीश सोबत त्याचा भाऊ शाकिब खान याला देखील अटक करण्यात आली आहे. शाकिबवर 19 पेक्षा जास्त गुन्हे दाखल असून शाकीबला एनसीबीने वांद्रे पोलिसांच्या ताब्यात दिले आहे.
दरम्यान, मुंबई नार्कोटिक्स कंट्रोल ब्युरोने 28 मे रोजी सुशांत सिंह राजपूतचा रूम पार्टनर आणि जवळचा मित्र सिद्धार्थ पीठानीला हैदराबादमधून अटक केली होती. एनसीबीने नीरज आणि केशव जे सुशांतचे नोकर होते त्यांची सुद्धा कसून चौकशी केली. या चौकशीनंतर हरीश खान याचे नाव समोर आले हरीश खान सुशांत सिंहला ड्रग्ज पोहोचवण्याचे काम करायचा.
हरीश त्याच्या भाऊ शकीब खान सोबत वांद्रे परिसरात ड्रग्सचा व्यापार करत होता. हारीश खानला दाऊद बनायचे होते आणि दाऊदसारखे मुंबईवर अधिराज्य गाजवायचे होते. आपली दहशत कायम ठेवण्यासाठी हरीश खान वांद्रे परिसरातील छोट्या ड्रग पेडलरच अपहरण करायचा आणि त्यांच्याकडे असलेले ड्रग्स जप्त करुन त्यांना आपल्या टोळीमध्ये काम करण्यास भाग पाडायचा. दरम्यान, एनसीबीचा तपास युद्धपातळीवर सुरु असून लवकरच यात अजून मोठे खुलासे होण्याची शक्यता वर्तवली जात आहे.
