बीपीएल मोहन मोरे चषक टी-20 क्रिकेट स्पर्धा
क्रीडा प्रतिनिधी /बेळगाव
युनियन जिमखाना आयोजित सहाव्या बीपीएल मोहन मोरे चषक टी -20 क्रिकेट स्पर्धेत सोमवारी खेळविण्यात आलेल्या सामन्यात सुपर एक्स्प्रेस युनियन जिमखाना संघाने एक्सेस डेव्हलपर्स सीसीआय संघाचा चार गडय़ांनी तर दुसऱया सामन्यात विश्रुत स्ट्रायकर्सने मोहन मोरे संघाचा 6 धावानी पराभव करून प्रत्येकी दोन गुण मिळविले. शिवप्रकाश हिरेमठ जिमखाना, राहुल नाईक विश्रुत स्ट्रायकर्स यांना सामनावीर पुरस्कार देण्यात आला.
पहिल्या सामन्यात ऍक्सस डेव्हलपर्स सीसीआय संघाने 20 षटकात 7 बाद 184 धावा केल्या. रवी उकळीने 45, चेतन पांगिरीने 31 तर झिनत एबीएमने 23 धावा केल्या. सुपर एक्स्प्रेस जिमखानातर्फे पुरूषोत्तम जकबलने 4 धावात 2 तर रोहित पाटीलने 40 धावात 2 गडी बाद केले. प्रत्युत्तरादाखल खेळताना सुपर एक्स्पेस युनियन जिमखाना संघाने 19.2 षटकात 6 बाद 185 धावा करून सामना 4 गडय़ांनी जिंकला. शिवप्रकाश हिरेमठने 41 चेंडूत 60, केतज कोल्हापुरेने 47, निलेश पाटीलने 43 धावा केल्या. ऍक्सेसतर्फे ज्ञानेश होनगेकरने 51 धावात दोन गडी बाद केले.
दुसऱया सामन्यात विश्रुत स्ट्रायकर्सने 20 षटकात 9 बाद 121 धावा केल्या. राहुल नाईकने 24, मुदस्सर नजरने 18 धावा केल्या. मोहन मोरेतर्फे आनंद कुंभारने 16 धावात 4, संतोष सुळगे पाटीलने 16 धावात 2 गडी बाद केले. प्रत्युत्तरादाखल खेळताना मोहन मोरे संघाचा डाव 15 षटकात सर्व बाद 115 धावात आटोपला. नरेंद्र मांगुरेने 27, ध्रुव नाईकने 25, विनित आडुरकरने 1 षटकार, 2 चौकारासह 23, दर्शन मयेकरने 17 धावा केल्या. विश्रुततर्फे अंगदराज हित्तलमनीने 21 धावात 4, राहुल नाईकने 8 धावात 3, रब्बानी दफेदारने 28 धावात 2 गडी बाद केले.
सामन्यानंतर प्रमुख पाहुणे निशिल पोतदार, चंदर कुंदरनाड, विनोद कवस यांच्या हस्ते सामनावीर शिवप्रकाश हिरेमठ, इम्पॅक्ट खेळाडू केतज कोल्हापुरे, उत्कृष्ट झेल रवी उकळी, सर्वाधिक षटकार निलेश पाटील तर दुसऱया सामन्यात प्रमुख पाहुणे विनायक दुगनकर, सुरज कारंडे, सुनील सक्री यांच्याहस्ते सामनावीर राहुल नाईक, इम्पॅक्ट खेळाडू अंगदराज हित्तलमनी, उत्कृष्ट झेल संतोष सुळगे पाटील, सर्वाधिक षटकार विनित आडुरकर यांना चषक देवून गौरविण्यात आले.
मंगळवारचे सामने -1) के. आर. शेट्टी किंग्स वि. मोहन मोरे इलेव्हन सकाळी 9 वा. 2) ऍक्सेस डेव्हलपर्स सीसीआय वि. विश्रुत स्ट्रायकर्स दुपारी 1 वा.
