आयुक्त नितीन कापडणीस : कायदेशीर उत्तर देणार : पहिला गुन्हा मनपानेच दाखल केला
प्रतिनिधी / सांगली :
अपेक्स रुग्णालयाला सर्व नियमांचे पालन करुनच परवानगी दिली आहे. परंतु या प्रकरणी महापालिका प्रशासनावर सातत्याने आरोप होत आहे. त्यामध्ये काहीही तथ्य नाही. त्यामुळे सीआयडी चौकशीच काय आपण नार्को चाचणीलाही तयार आहे, असे प्रत्युत्तर मनपा आयुक्त नितीन कापडणीस यांनी गुरुवारी दिले. दरम्यान केरोनाचे वातावरण शांत झाल्यानंतर आरोप करणाऱयांना कायदेशीर उत्तरही देणार असल्याचे त्यांनी सांगितले.
महापालिकेने या रुग्णालयाला दिलेल्या परवानगीमुळे गदारोळ निर्माण झाला आहे. आयुक्तांसह वैद्यकीय अधिकाऱयांवर आरोप होत आहेत. सातत्याने आरोप होत असल्याने गुरुवारी आयुक्त नितीन कापडणीस यांनी मौन सोडले. कापडणीस म्हणाले, रुग्णांना बेडची कमतरता भासत असल्याने खासगी रुग्णालयातील 80 टक्के बेड कोरोना रुग्णांसाठी अधिग्रहित करण्याच्या शासनाच्या सूचना होत्या. बॉम्बे नर्सिंग ऍक्टमधील अनेक रुग्णालयांना कोविड हॉस्पिटल म्हणून परवानगी दिली. या परवानगी देताना सर्व नियमांचे पालन केले आहे.
अपेक्सला परवानगी देतानाही सर्व नियमांचे पालन करण्यात आले आहे. जिल्हा परिक्षण समितीनेही अपेक्स रुग्णालयाची तीनवेळा पाहणी केली. त्याचा अहवाल महापालिकेला दिला नाही. तो नियंत्रण कक्षाला देण्यात आला. त्यापैकी 7 मेच्या अहवालात रुग्णालयातील मृत्यूदर अधिक असल्याचा उल्लेख आहे. पण महापालिकेने तत्पूर्वीच हे रुग्णालय सील केले होते. सुरूवातीला रुग्णांची बिले, नातेवाईकांशी उद्धट वर्तनाच्या तक्रारी आल्या. स्वत: रुग्णालयात जावून पाहणी केली. नातेवाईकांशी संवाद साधला. रुग्णालयात अनेक त्रुटी दिसून आल्या. त्यात सुधारणा करण्यासाठी तीन दिवसाची मुदत दिली होती.
मात्र या मुदतीत रुग्णालयातील सुविधांबाबत काहीच सुधारणा झाली नाही. ऊलट तक्रारींचा ओघ सुरुच होता. त्यामुळे कोविड हॉस्पिटलचा परवाना रद्द केला. नवीन रुग्ण दाखल करुन न घेण्याची सूचना रुग्णालय व्यवस्थापनाला केली होती. मात्र त्यानंतरही रुग्णालयात कोरोना रुग्णांवर उपचार सुरू असल्याची माहिती मिळाली. त्यानंतर तातडीने आरोग्याधिकारी डॉ. सुनिल आंबोळे यांनी छापा टाकून हे रुग्णालय सील केले. त्यानंतर महापालिकेच्यावतीनेच पहिला गुन्हा दाखल केला होता. तरीही महापालिकेवरच आरोप सुरू आहेत. त्यामुळे कोणत्याही चौकशीला समोरे जाण्याची तयारी असल्याचे सांगत कापडणीस म्हणाले, केवळ सीआयडी चौकशीच नव्हे तर नार्को चाचणीला आपण तयार आहोत. सध्या कोरोनाच्या तिसऱया लाटेची तयारी सुरू आहे. वातावरण शांत झाल्यानंतर आरोपकर्त्यांना कायदेशीर उत्तरही देणार आहे.
आरोपात तथ्य नाही
अपेक्स रुग्णालयाला परवानगी देताना महापालिका प्रशासनाने सर्व नियमांचे पालन केले आहे. रुग्णालयाबाबत तक्रारी प्राप्त झाल्यानंतर पाहणी करुन नोटीसही दिली होती. त्यानंतरही कारभार न सुधारल्याने रुग्णालय बंद केले. पहिला गुन्हाही महापालिकेनेच दाखल केला आहे. त्यामुळे महापालिका प्रशासनावर होणाऱया आरोपामध्ये काहीही तथ्य नाही.
नितीन कापडणीस, आयुक्त. मनपा
