मुख्यमंत्र्यांचे आश्वासन : सिंधुदुर्गातील विविध प्रश्नांकडे आमदार केसरकर, नाईक यांनी वेधले लक्ष
प्रतिनिधी / सिंधुदुर्गनगरी:
मुख्यमंत्री उद्धव ठाकरे यांनी घेतली कोकणातील आमदारांची बैठक कोकणातील विविध प्रश्नांबाबत राज्याचे मुख्यमंत्री उद्धव ठाकरे यांनी मंगळवारी वर्षा निवासस्थानी कोकणातील आमदारांची बैठक घेतली. या बैठकीत आमदार दीपक केसरकर व वैभव नाईक यांनी सिंधुदुर्ग जिल्हय़ातील विविध प्रश्न मांडले. यामध्ये शासकीय मेडिकल कॉलेज संदर्भातील बैठकीबाबत आमदार वैभव नाईक यांनी विचारणा केली. त्यावर लवकरच ही बैठक घेऊन शासकीय मेडिकल कॉलेजला चालना देण्यात येईल, असे मुख्यमंत्री ठाकरे यांनी आश्वासित केले.
आमदार नाईक म्हणाले, सिंधुदुर्ग जिल्हय़ात दर्जेदार आरोग्य सुविधा मिळण्यासाठी शासकीय मेडिकल कॉलेज होणे गरजेचे आहे. जेणेकरुन सिंधुदुर्ग जिल्हय़ाला कोणत्याच आजार साथरोग प्रसंगी इतर जिल्हय़ावर अवलंबून राहवे लागणार नाही. सध्यस्थितीत आहे, त्या आरोग्य सुविधांचा वापर करून जिल्हय़ात रुग्णांवर उपचार सुरू आहेत. परंतु शासकीय मेडिकल कॉलेज ही जिल्हय़ाची गरज आहे. ती लवकरात लवकर पूर्ण करावी, याकडे मुख्यमंत्र्यांचे लक्ष वेधले.
आमदार केसरकर व नाईक यांनी बांदा ते चांदा योजनेच्या ऐवजी प्रस्तावित असलेली सिंधु-रत्न योजना लवकरात लवकर कार्यान्वीत करण्याची मागणी केली. तसेच एस. आर. अंतर्गत रस्ते दुरुस्तीचा कार्यक्रम घेऊन निधी देण्याची मागणी करण्यात आली. सिंधुदुर्ग जिल्हय़ातील रिक्त पदांबाबत चक्राकार पद्धतीने पदभरती घेण्याची मागणी करण्यात आली. सीआरझेड जनसुनावणीमध्ये सिंधुदुर्ग जिल्हय़ातील नागरिकांनी ज्या अटी शिथिल करण्याची मागणी केली, त्याचा विचार करून पुनःआराखडा व्हावा. समुद्री उधाणांमुळे किनारपट्टी भागात जमिनीची धूप होत असून धूपप्रतिबंधक बंधारे मंजूर करावेत. त्याचप्रमाणे घरबांधणी परवानगीचे अधिकार ग्रा. पं. कडे देण्याबाबत निर्णय झालेत. परंतु त्याची अंमलबजावणी होत नसून त्याबाबत योग्य ती कार्यवाही करून घरबांधणी परवानगीचे अधिकार पूर्ववत ग्रा. पं. कडे देण्यात यावे, अशी मागणी करण्यात आली. या सर्व बाबींवर मुख्यमंत्री उद्धव ठाकरे यांनी सकारात्मक प्रतिसाद दिला असून लवकरच संबंधित विभागाच्या बैठका घेऊन हे विषय मार्गी लावणार असल्याचे सांगितले असल्याची माहिती आमदार नाईक यांनी दिली आहे.
याप्रसंगी राज्याचे उद्योगमंत्री सुभाष देसाई, परिवहन मंत्री अनिल परब, मुख्यमंत्री यांचे विशेष कार्यकारी अधिकारी मिलिंद नार्वेकर, ऊर्जा विभाग प्रधान सचिव असीम गुप्ता, मुख्यमंत्र्यांचे मुख्य सचिव आशिषकुमार सिंग, मुख्य सचिव विकास खारगे, सल्लागार सचिव अजय मेहता आदी उपस्थित होते.
