पोलिसांच्या कार्यतत्परतेमुळे वाचले तीन जीव
ऑनलाईन टीम / लोणावळा :
सासुरवाडीत जाऊन पत्नीवर कोयत्याने वार करत जीवघेणा हल्ला करणाऱया पतीला पोलिसांनी अटक केली आहे. लोणावळय़ातील न्यू तुंगार्ली येथे हा प्रकार घडला.
राजाराम साहेबराव जाधव (रा. कशाळभोईरे, ता. मावळ, जि. पुणे) असे याप्रकरणी अटक केलेल्या आरोपीचे नाव आहे. याबाबत जाधव यांची सासू सखुबाई गबळू लंके (वय 65, रा. न्यू तुंगार्ली, लोणावळा) यांनी फिर्याद दिली आहे.
मिळालेल्या माहितीनुसार, आरोपी राजाराम जाधव व फिर्यादी यांची मुलगी अनिता याचे 25 वर्षापूर्वी लग्न झाले आहे. लग्न झाल्यापासून जाधव हा बायकोला मारहाण करत असल्याने लग्नानंतर दीड वर्षापासून ती माहेरी निघून आली. तेव्हापासून ते विभक्त रहात आहेत. असे असले तरी राजाराम जाधव हा सासुरवाडीत येऊन अनिता यांना शिवीगाळ व मारहाण करायचा.
सोमवारी राजाराम जाधव हा कोयता घेऊन सखुबाई व अनिता माळीकाम करत असलेल्या बंगल्यात गेटवरुन उडी मारुन घुसला. त्याने प्रथम सासू वर व नंतर अनितावर जिवघेणा हल्ला केला. अंगात सैतान संचारल्याप्रमाणे त्याने अनिताच्या चेहऱयावर व हातावर सपासप वार करत तिला जीवे मारण्याचा प्रयत्न केला.
हा सर्व प्रकार फिर्यादी यांचा मुलगा रामचंद्र लंके याने लोणावळा शहर पोलीसांना कळविल्यानंतर पोलीस निरीक्षक बी.आर.पाटील यांच्या मार्गदर्शनाखाली पोलीस हवालदार अमोल कसबेकर, पंढरीनाथ कामठे अवघ्या पाच मिनिटांत घटनास्थळी दाखल झाले. त्यांनी आरोपी राजाराम याला घरात कोंडत सखूबाई व सुष्मा यांची त्याच्या तावडीतून सुटका केली. रुग्णवाहिकेची वाट न पाहता पोलीस जीपमधून अनिता यांना रुग्णालयात दाखल केले. पोलिसांच्या या कार्यतत्परतेमुळे तीन जिव वाचले.
