उपनगरांत दुचाकी चोरांचा उपद्रव वाढताच
प्रतिनिधी /बेळगाव
शहर व उपनगरांत दुचाकी चोरीच्या घटना वाढल्या आहेत. मोटार सायकलींबरोबरच सायकली चोरण्याचे प्रकारही वाढले आहेत. गुरुवारी मंडोळी रोडवरील नित्यानंद कॉलनी येथे (अमृता विद्यालयाजवळ) सायकल चोरीची घटना घडली आहे.
कोमल पारेश पाटील यांनी आपल्या कंपाऊंडमध्ये ठेवलेली सुमारे 12 हजार रुपये किंमतीची सायकल चोरण्यात आली आहे. गुरुवारी 4.17 वाजण्याच्या सुमारास ही घटना घडली असून संपूर्ण प्रकार सीसीटीव्हीत कैद झाला आहे. बेळगाव ग्रामीण पोलिसांना या घटनेची माहिती देण्यात आली आहे.
4.15 वाजण्याच्या सुमारास दुचाकीवरुन तिघे जण नित्यानंद कॉलनी परिसरात आले. एकटा खाली उतरुन कोमल पाटील यांनी आपल्या कंपाऊंडमध्ये लावलेली सायकल पळविली. तर आणखी दोघे जण दुचाकीवरुन तेथून पसार झाले. हा संपूर्ण प्रकार सीसीटीव्हीत कैद झाला असून या घटनेने परिसरात खळबळ माजली आहे.
