अपघातांच्या संख्येत वाढ, उपाययोजनांची ग्रामस्थांची मागणी
प्रतिनिधी / नागठाणे :
सातारा तालुक्यातील सातारा-आसनगाव रस्त्यावर असणारा सोनगाव फाटा हा अपघातांचा हॉटस्पॉट ठरत आहे. सोनगाव फाटा येथे तीन मार्गावरचे रस्ते एकत्र मिळत असल्याने या ठिकाणी अपघातांच्या संख्येत कमालीची वाढ झाली आहे. तरी सार्वजनिक बांधकाम विभागाने या परिसरात मोठे सुचना फलक व झेब्रा क्रॉसिंग इत्यादींची उपाययोजना करावी, अशी मागणी परिसरातील ग्रामस्थांच्या वतीने करण्यात येत आहे.
सातारा-आसनगाव व बोगदा-शेंद्रे या रस्त्यावर मोठ्या प्रमाणात वाहतूक सुरू असते. या रस्त्यावरच असणार्या सोनगाव फाटा येथे व्यवसायिक गाळे व मंगल कार्यालय असल्यामुळे या परिसरात लोकांची मोठ्या प्रमाणात वर्दळ असते. परंतु या परिसरात तीन रस्ते एकत्र येत असल्यामुळे सातारामार्गे, शेंद्रे मार्गे व आसनगाव मार्गे येणारे वाहन सोनगाव फाटा या चौकात एकत्र येतात.
या परीसरात तिन्हीही मार्गावर सूचना फलक, झेब्रा क्रॉसिंग किंवा गतिरोधक नसल्याने वाहनधारकांना पुढे चौकात रस्त्यावरील वाहनांचा अंदाज येत नसल्याने या परीसरात अपघातांच्या संख्येत मोठी वाढ झाली आहे. तरी या परीसरात बांधकाम विभागाने याची दखल घेऊन योग्य ती उपाययोजना करावी, अशी मागणी सोनगाव, शेळकेवाडी, कुमठे व आसनगाव परीसरातील ग्रामस्थ करीत आहेत.
