सातारा : शहीद जवान सुजित किर्दत यांच्या पार्थिवावर आज चिंचणेर निंब येथे शासकीय इतमामात अंत्यसंस्कार करण्यात आले.
यावेळी आमदार शशिकांत शिंदे, आमदार महेश शिंदे, जिल्हा परिषदेचे मुख्य कार्यकारी अधिकारी विनय गौडा, पोलीस अधीक्षक अजयकुमार बन्सल, प्रांताधिकारी मिनाज मुल्ला, तहसीलदार आशा होळकर, सहायक पोलीस अधीक्षक आंचल दलाल, कमांडर स्टेशन हेडक्वार्टर कोल्हापूरचे कर्नल पराग गुप्ते यांनी शहीद जवान किर्दत यांना पुष्पचक्र वाहून मानवंदना दिली.
किर्दत अंत्ययात्रेदरम्यान, मार्गामार्गावर रांगोळ्यांचा सडा घालण्यात आला होता. चौकाचौकात आदरांजलीचे फ्लेक्स लावले होते. ‘अमर रहे अमर रहे सुजित किर्दत अमर रहे, भारत माता की जय,’ अशा घोषणा देत ही अंत्ययात्रा अंत्यविधीच्या ठिकाणी पोहचली.
पोलीस दलाच्या व भारतीय सैन्य दलाच्या जवानांच्या तुकडीने हवेमध्ये बंदुकीच्या फैरी झाडून आणि अंतिम बिगुल वाजवून मानवंदना दिली.
वडील नवनाथ, पत्नी सुवर्णा, मुलगा आर्यन, मुलगी इच्छा, भाऊ अजित यांनी पार्थिवाचे अंतिम दर्शन घेतले. शहीद किर्दत यांचा मुलगा आर्यन यांनी पार्थिवाला मुखअग्नी देऊन अंत्यसंस्कार केले. यावेळी जिल्हा सैनिक कल्याण अधिकारी विजयकुमार पाटील, सातारच्या गटविकास अधिकारी सुवर्णा चव्हाण, यांच्यासह लष्कराचे विविध आजी, माजी अधिकारी, विविध विभागाचे अधिकारी आणि हजारोच्या संख्येने ग्रामस्थ उपस्थित होते.
