ऑनलाईन टीम / इंदापूर :
इंदापूर तालुक्यातील घोलपवाडीच्या फरार देवऋषीला वालचंद पोलिसांनी दहिवडी परिसरात सापळा रचून आज पहाटे अटक केली.
उत्तम लक्ष्मण भागवत असे अटक करण्यात आलेल्या या देवऋषीचे नाव आहे. त्याच्यावर वालचंद पोलिसांनी जादूटोणा प्रतिबंधक कायदा व आर्थिक फसवणूकीच्या कायद्याखाली गुन्हा दाखल केला आहे.
मिळालेल्या माहितीनुसार, भागवत या देवऋषीच्या अंधश्रद्धेचा वालचंद पोलिसांनी अंधश्रद्धा निर्मूलन समितीच्या वतीने पर्दाफाश केला होता. साधारण दहा वर्षांपूर्वी गुन्हा दाखल झाल्यानंतर हा देवऋषी फरार झाला होता. अटक होईपर्यंत त्याच्यावर गुन्हा दाखल करण्यास कोणी तयार नव्हते. वालचंद पोलिसांनी घटनेचे गांभीर्य ओळखून त्याच्या अटकेसाठी तीन पथके तैनात केली होती. अखेर आज पहाटे हा देवऋषी दहिवडी परिसरात पोलिसांच्या जाळ्यात अलगद फसला.
देवऋषीच्या अटकेनंतर फलटण तालुक्यातील आसू येथील दादासाहेब कमाने यांनी पहिली तक्रार दिली आहे. त्यानंतर 12 लाख रुपयांच्या फसवणुकीचा भागवत याच्यावर गुन्हा दाखल झाला आहे.
