प्रतिनिधी / मिरज
मिरज तालुक्यातील सावळी येथे एसटी स्थानकाजवळ कमरेला विनापरवाना देशी बनावटीचे पिस्तूल घेऊन फिरणाऱ्या विनोद चंदू कांबळे (वय 28, रा. मेढगिरी, ता. जत) या तरुणास स्थानिक गुन्हा अन्वेषण शाखेच्या पोलिसांनी अटक केली. त्याच्याकडून पिस्तूलही जप्त करण्यात आले आहे.
स्थानिक गुन्हा शाखेच्या पोलिस कर्मचाऱ्यांना खबऱ्यांमार्फत मिळालेल्या माहिती नुसार विनोद कांबळे हा तरुण कमरेला पिस्तूल लावून सावळी एसटी स्टँडजवळ थांबला असल्याचे समजले. पोलिसांनी तेथे सापळा रचला असता कांबळे हा पिस्तूलसह मिळून आला. पोलिसांनी त्याच्याकडे पिस्तूल व त्याच्या परवान्याबाबत विचारणा केली असता, त्याने उडवाउडवीची उत्तरे दिली. स्थानिक गुन्हा शाखेच्या पोलिसांना त्याला अटक करुन पुढील तपासासाठी एमआयडीसी पोलिसांच्या ताब्यात दिले आहे.
